भांगरभूंय | प्रतिनिधी
आमदार प्रेमेंद्र शेट हांणी पत्रकार परिशदेंत दिली म्हायती
दिवचल, प्रतिनिधी: कुडचिरें बाराजण हांगाचो नियोजीत बांदकाम कोयर प्रक्रिया प्रकल्प रद्द करचो. लोकभावना, ग्रामस्थांनी केल्लो विरोध तशेंच गांवचो एकवट कायमचो उरपा खातीर अशी भुमिका घेतल्या. मुख्यमंत्री डॉ. प्रमोद सावंत हांचे कडेन चर्चा केले उपरांत हे विशींचो निर्णय घेतिल्ल्याची म्हायती आमदार प्रेमेंद्र शेट हांणी दिली.
दोन म्हयन्यां आदीं ह्या प्रकल्पा विशीं सर्वेक्षण करपा खातीर आयिल्ल्यांक ग्रामस्थांच्या विरोधाक तोंड दिवचें पडलें. उपरांत विरोधकांनी राजकारण करपाक जायते आरोप केल्ले. मात आमी गांवच्या लोकां फाटल्यान आशिल्ल्यान लोकांची भावनां लक्षांत घेवन आनी सविस्तर विचार करून हो प्रकल्प हांगाच्यान रद्द करपाची भुमिका घेतल्या. हे विशीं मुख्यमंत्री डॉ. सावंत हांकां लोकांच्यो भावना कळयिल्ल्याचें प्रेमेंद्र शेट हांणी स्पश्ट केलें. हे विशीं मुख्यमंत्री योग्य भुमिका घेतले अशें तांणी सांगलें.
विरोधकांनी राजकारण करून लोकांची दिशाभूल करपाचो यत्न केलो. मात आमी आमची भुमिका लोकांची भावना लक्षांत घेवन निश्चीत केल्या. हो प्रकल्प रद्द करपाची मागणी डॉ. सावंत हांचे कडेन केल्या. लोकांची मागणी निश्चीतूच मान्य जातली अशें आमदार शेट हांणी स्पश्ट केलें.
ह्या वेळार सरपंच प्रियंवदा गांवकार हांणी पंचायत मंडळान या प्रकल्पाक विरोध केल्ल्यान लोकां वांगडा रावन लोकभावनेचो आदर करपाची मागणी केली. हाका आमदार प्रेमेंद्र शेट आनी मुख्यमंत्री डॉ. प्रमोद सावंत हांणी सहकार्य करून प्रकल्प रद्द करपाची भुमिका घेवपा विशीं सकारात्मकताय दाखयल्या ताका येवकार अशें तांणी सांगलें.
सदा गांवकार हांणी गांवाचो विरोध आसल्यार तो आमकां नाका ही भुमिका आशिल्ली ताका आमदार शेट हांणी फाटबळ दिलां. ताका लागून सरकारान आतां हो प्रकल्प रद्द केल्ल्याची घोशणा करची अशें स्पश्ट केलें.
ह्या वेळार मावळिंगे, कुडचिरें पंचायत वांगडी, तशेंच जिल्हो अध्यक्ष शंकर चोडणकार, भाजप मंडळ अध्यक्ष दया कारबोटकार, थळावे ग्रामस्थ आनी हेर हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
