भांगरभूंय | प्रतिनिधी
मुरगांव, प्रतिनिधी : सांकवाळे, सावळफोंड जावपी प्रमेश कन्स्ट्रक्शनाच्या ‘भूतानी इन्फ्रा’ प्रकल्पाक दिल्लो परवानो बेगोबेग फाटीं घेवपा खातीर आपूण यत्न करता. हे खातीर भूतानी इन्फ्रा प्रकल्पाच्या आड आमरण अपोशणाक बशिल्ले ज्येश्ट नागरीक तशेंच साकवाळे पंचायतीचे आदले सरपंच प्रेमानंद नायक हांणी आपलें उपोशण फाटीं घेवचें, अशी मागणी कुठ्ठाळेचे आमदार आंतोन वास हांणी केली. तशेंच कुठ्ठाळे जनतेची परवानगी आशिल्ले प्रकल्प उबारतले. जनतेक नाका आशिल्ल्या प्रकल्पांक हांगा केन्नाच हाडपाक दिवचों ना अशी म्हायती आमदार वास हांणी दिली.
कुठ्ठाळेच्या सांकवाळे पंचायत वाठारांतल्या सावळफोंड गांवांत येवपी प्रमेश कस्ट्रक्शनाचो ‘भूतानी इन्फ्रा’ प्रकल्पा आड आंदोलन आनीक चाळवपाची शक्यताय वाडल्या. कारण भूतानी प्रकल्पाच्या आड सांकवाळेचे आदले सरपंच तशेंच ज्येश्ठ नागरीक प्रेमानंद नायक फाटल्या तीन दिसां सावन आमरण उपोशणाक बसल्यात. हाका लागून तांची भलायकी इबाडल्या. तांकां प्रेशराचो त्रास जावपाक लागिल्ल्यान तांचेर दोतोर नदर दवरून आसा. जो मेरेन भूतानी प्रकल्प सांकवाळेच्यान भयर मारिना. तो मेरेन म्हजें उपोशण चालूच उरतलें, अशें प्रेमानंद नायक हांणी आमदार आंतोन वास हांकां सांगलें. तुमी म्हजी भेट घेवपाक आयिल्ले खातीर हांव तुमचो ऋणी आसा. आमदार वास हांणी भाजप सरकाराक फाटबळ दिल्ल्यान तांणी सरकारी दरबारी आमच्या गांवाच्या बर्या खातीर फुडाकार घेवचो अशी मागणी नायक हांणी केली.
सांकवाळे पंचायत वाठारांत जायते प्रकल्प जनतेचो विरोध आसूनय उबारल्यात. हाका पुरायेन सांकवाळ पंचायतीचे सत्ताधारी पंच वांगडी आशिल्ल्याची माहिती आमदार आंतोन वास हांणी दिली. आमदार वास हांणी प्रेमानंद नायक हांकां उपोशण फाटीं घेवपाची मागणी केली.
पंच तशेंच गोंय भाजपा अध्यक्ष तुळशिदास नायक हांणी सांगलें, प्रेमानंद नायक हांकां उपोशणाक बसपाची वेळ सांकवाळ पंचायतीचे सत्ताधारी पंच वांगडी वांगडा पंचायत मंत्री मॉविन गुदिन्हो जापसालदार आसा. भूतानी इन्फ्रा प्रकल्पाक जितली मान्यताय मेळ्ळी तातूंत पंचायत मंत्र्याचो आसपाव आशिल्ल्याची शक्यताय पंच नायक हांणी उक्तायल्या? पंचायत मंत्र्यांनी स्वता जावन भूतानी इन्फ्रा प्रकल्पाक सांकवाळे पंचायती वरवीं दिल्ले परवाने रद्द करचे, अशी मागणी तांणी केली.
पंच मॉरव्हील कार्व्हालो हांणी, प्रेमानंद नायक हांचे भलायकेक धोको निर्माण जाला. हाका पुरायेन जापसालदार सांकवाळे पंचायतीचे उपसरपंच डॅरिक वालिस आसतले. कारण भूतानी इन्फ्रा प्रकल्प सांवळफोंड तांच्यात प्रभागांत आयिल्ल्यान हो प्रकल्प हांगा उबारपाक उपसरपंचानी फुडाकार दिला. आदले उपसरपंच गिरीश पिल्ले आनी उपसरपंच डॅरिक वालिस भूतानी इन्फ्रा प्रकल्प सांकवाळे हाडपाक जापसालदार आशिल्ल्याचें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
