भांगरभूंय | प्रतिनिधी
न्यूयाॅर्क, खबरां संस्था: अमेरिकेंतल्या मॅकडोनाल्ड्स बर्गरांतल्यान बॅक्टेरियाचो संसर्ग (ई. कोलाय बॅक्टेरिया) पातळ्ळा. मॅकडोनाल्ड्स क्वार्टर पावंडर हॅम्बर्गर खावन एका मनशाक मरण आयलें. त्याच वेळार ४९ जाण दुयेंत आसात, तातूंतले १० जाण हॉस्पिटलांत आसात.
यूएस सेंटर्स फॉर डिसीज कंट्रोल अँड प्रिव्हेन्शनच्या (CDC) मतान हो ई. कोलाय व्हायरस आतां मेरेन अस्तंतेच्या १० राज्यांनी पातळ्ळा आनी चडशे दुयेंती कोलोरॅडो आणि नेब्रास्का हांगा मेळ्ळ्यात. बर्गर खाल्ले उपरांत एक मनीस दुयेंत पडना फुडें मॅकडोनाल्डन आपल्या क्वार्टर पावंडर हॅम्बर्गरच्यान चिरून घाल्लो कांदो आनी बीफ काडून उडयलां. सध्या हे विशीं तपास सुरू आसात.
मॅकडोनाल्ड यूएसएचे अध्यक्ष जो एर्लिंगर हांणी एका व्हिडिओ संदेशांत म्हणलां, आमचे खातीर जेवणाची सुरक्षा सामकी गरजेची. ज्या भागांत बर्गरा विशीं कागाळी आयल्यात थंयच्या रॅस्टोरंटांतल्यान क्वार्टर पावंडर तात्पुरतो काडून उडोवपाचो निर्णय घेतला. तांणी म्हणलां चडश्या राज्यांक हाचो फटको बसूंक ना. कागाळी आयल्यात तातूंत एकूच कंपनी कांद्याची पुरवण करता हें कंपनीन मान्य केलां.
E. coli व्हायरस म्हळ्यार कितें?
E. coli हो एके तरेचो बॅक्टेरिया. जी तुमची पचनसंस्था घटमूट दवरपाक मजत करता. मात तुमी दुशीत जेवण जेवल्यार वा उदक पिल्यार कांय स्ट्रेनाक लागून अतिसार जावं येता.
E. coli च्या O157:H7 स्ट्रेनाक लागून दुयेंत पडपाक शकता. ३१ वर्सां आदीं म्हळ्यार १९९३ वर्सा ह्या विशाणूक लागून खुबश्या जाणांक मरण आयिल्लें. उपरांत जॅक इन द बॉक्स रेस्टॉरंटांत शिजोवंक नाशिल्ले हॅम्बर्गर खाल्ल्यान चार भुरग्यांक मरण आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
