उदक म्हणल्यार सर्वस्व

भांगरभूंय | प्रतिनिधी

थोडे जेवतना उदक पियेतात हें सामकें चुकीचें. थोडे उबें रावन घटाघटा उदक पियेतात. हातूंत आमचे कुडीक फायदो जावचे बदला लुकसाणूच जाता.

उदक म्हणल्यार सर्वस्व. आमच्या जिविताचो तें मुख्य घटक. फक्त मनशांकूच न्हय, तर जिव्या सुकण्यांक, प्राण्यांक सगल्यांकूच उदकाची खूब गरज आसा. आमचे कुडीक दिसाक चार लीटर उदकाची गरज आसता. हें खबर आशिल्ले लोक पसून खूबच उणें उदक पियेता. कुडींत कमी उदक आसप म्हणल्यार धोक्याचें. सदांच उणें उदक पियेल्यार दुयेंसां जावपाची भिरांत आसता. उदक नासल्यार दोळ्यांचेर परिणाम जावं शकता. मुताचो रंग पसून बदलता. हळडुवोच जाता. थोड्यांक मुत्ताना जळजळ जाता. खाज सुट्टा. कुडींत उणें उदक आसल्यार रक्तांत आॅक्सिजनाचो उणाव जाता आनी कार्बन डायआॅक्सायडाची पातळी वाडटा. मनशाक थकपाक जाता. तोंड, ताळो सुकता. उदक उणें पियेत जाल्यार घामूय येता. अन्न पचोवपाचे शक्तीचेर वायट परिणाम जाता. कोठ्याची पिडा सतायता. थोड्यांक संडास जातना त्रास जातात. पोटांत दुखता. कांत खरखरीत जाता. किडनी पसून सारकें काम करीना. मुतखडोय जावं येता. ताकाच लागून उदक प्रमाणांत पियेवपाक जाय. उणें पियेत जाल्यार तणाव निर्माण जाता. आमच्या रक्तदाबाचेर परिणाम जाता. कुडीक जाय तितलें उदक मेळना जाल्यार वजनूय वाडटा.
थोडे जेवतना उदक पितात हें सामकें चुकीचें. थोडे उबें रावन घटाघटा उदक पियेतात. हातूंत आमचे कुडीक फायदो जावचे बदला लुकसाणूच जाता. काळजाचो आताक पसून येवपाची शक्यताय आसता. जेवतना उदक पिवचें पूण तें जेवण जाले उपरांत सवकास पिवचें. हरशी तान लागता तशी घोट घोट उदक पिवप बरें. तें शांत चित्तान पिवचें. उदक पियेतकच तें कुडींतल्या पेशीं मेरेन पावता. ताका लागून आमी जें कितें जेवतात ताचें पचन बरें जाता. उदक मनशाची तान भागयता. कश्ट करपी लोक खूब उदक पियेतात. तांचे कुडीक फावो तितलें उदक मेळटा. ल्हान भुरग्यांक पसून वाटी, चमच्यान उदक पियेवपाची संवय ल्हानपणा सावन लावप खरेंच बरें. थोड्यांक फ्रिजांतलें थंडगार उदक पियेवपाची संवय आसता. थंड उदक पियेवचें, पूण तापोवन थंड केल्लें. फ्रिजांत दवरिल्लें न्हय. उदक नितळ, शुद्ध आसतलें, हाचीय जतनाय घेवपाक जाय.

सिद्धी तिळवे
9158200956