भांगरभूंय | प्रतिनिधी
काठार पास जावपा इतलेय गूण ह्या कामांक मेळचे नात : विजय केंकरे
पणजी : कला अकादमी नुतनीकरणाच्या कामांचो दर्जो सामको सकयले पातळेवेलो आसा. कृती दळाचे तपासणे वेळार कामां काठार पास जावपा इतलेय गूण ह्या कामांक मेळचे नात, अशें कृती दळाचे अध्यक्ष, नामनेचे दिग्दर्शक विजय दामू केंकरे हांणी बसके उपरांत सांगलें. तज्ज्ञांच्या सल्ल्यान कांय कामां परत नव्यान हातांत घेवचीं पडटलीं अशेंय मतूय तांणी मांडलें.
सरकारान ५० कोटीं परस चड निधी खर्च करून कला अकादमीची दुरूस्ती आनी नुतनीकरण केलां. नुतनीकरणाच्या कामांचेर आदीं सावनूच दुबाव उक्तायताले. कामांत भ्रश्टाचार जाल्ल्याचो आरोप विरोधी पक्ष तशेंच कलाकारांनी जायते फावटीं केला.
कामांच्या दर्जाची तपासणी जावपाक जाय, अशी मागणी कलाकारांनी केले उपरांत मुख्यमंत्री डॉ. प्रमोद सावंत हांणी कृती दळाची स्थापना केली. विजय केंकरे हे कृती दळाचे अध्यक्ष आसात. तोमाझिन कार्दोज, प्रवीण गांवकार, देवीदास आमोणकार मेळून १३ जाण कृती दळाचे वांगडी आसात.
सोमारा कला अकादमीची पळोवणी केले उपरांत कृती दळाची मंगळारा बसका जाली. पळोवणी करतनाच स्टेज तशेंच एसीच्या यंत्रणां विशीं वांगड्यांनी नापसंती उक्तायल्ली. उपरांत मंगळारा वांगड्यांची बसका जाली.
स्टेज, आवाजाची यंत्रणां, एसी सयत सगळ्यांच कामांनी दोश आशिल्लो. तज्ज्ञांचो सल्लो घेवन कांय कामां नव्यान करचीं पडटलीं. नुतनीकरणाचीं कामां ज्या कंत्राटदारांनी केल्यांत, तांचे कडेन १० नोव्हेंबराक बसका जातली, अशें अध्यक्ष केंकरे हांणी बसके उपरांत सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
