भांगरभूंय | प्रतिनिधी
ग्लासगो, खबरां संस्था: राष्ट्रकूल सर्त आयोजकां कडल्यान (कॉमनवेल्थ गेम्स) भारता खातीर एक वायट खबर आयल्या. हाका लागून सर्तींत पदकां मेळोवपाचे शक्यतायेक फटको बसला. हॉकी, बॅडमिंटन, कुस्ती, क्रिकेट आनी नेमबाजी अश्या मुखेल खेळांक २०२६ त जावपी सर्तीच्या कार्यावळींतल्यान कुशीक दवरल्यात. खर्च मर्यादीत करपा खातीर टेबल टेनीस, स्क्वॅश आनी ट्रायथलॉन ह्या खेळांचोय सर्तींत आस्पाव नासतलो. बर्मिंगहॅमांत २०२२ च्या कॉमनवेल्थ गेम्सांत आस्पाव जाल्ले णव खेळ फुडल्या गेम्सचो भाग आसचे नात. २०२६ त २३ जुलय ते २ ऑगस्ट ह्या काळांत कॉमनवेल्थ गेम्स जावपाच्यो आसात. ग्लासगो ह्यान पयलीं २०१४ त राष्ट्रकुल खेळां सर्तीचें आयोजन केल्लें.
अॅथलेटिक्स आनी पॅरा अॅथलेटिक्स (ट्रॅक- फील्ड), स्विमिंग आनी पॅरा स्विमिंग, जिम्नॅस्टिक्स, ट्रॅक सायकलिंग आनी पॅरा ट्रॅक सायकलिंग, नेटबॉल, वेटलिफ्टिंग आनी पॅरा पॉवरलिफ्टिंग, बॉक्सिंग, ज्युडो, बोल्स हांचो आसपाव आसा. पॅरा बाऊल्स, ३×३ बास्केटबॉल आनी ३×३ व्हीलचेअर बास्केटबॉलचो आसपाव केला अशें कॉमनवेल्थ गेम्स फेडरेशनान सांगलें.
निवेदना प्रमाण, हे खेळ स्कॉटटावन स्टेडियम, टोलक्रॉस इंटरनॅशनल स्विमिंग सेंटर, एमिरेट्स एरिना आनी स्कॉटिश कॉम्पिटिशन कॉम्प्लेक्स (SEC) ह्या चार सुवातांचेर आयोजीत केल्ले. खेळगडे आनी तांच्या सपोर्ट स्टाफाक हॉटेलांत रावपाची वेवस्था करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
