भांगरभूंय | प्रतिनिधी
काणकोण, प्रतिनिधी : मडगांवां जावपी अ. भा. कोंकणी परिशदेच्या अधिवेशनांत काणकोणच्यान चडांत चड प्रतिनिधी वांटेकार जावपाचे नदरेन यत्न करपाचें काणकोणा जाल्ले बसकेंत थारायलें.
अधिवेशनाचे अध्यक्ष आनी जाळवणदार हांचे कडेन चर्चा करपाच्या काणकोण कोंकणी कला केंद्राच्या पद्धती प्रमाण घोंटेर चावडी काणकोणा वार्तालापाची कार्यावळ घडोवन हाडली. ह्या वेळार अधिवेशनाचे स्वागताध्यक्ष प्रशांत नायक, कार्याध्यक्ष अनंत अग्नी आनी सचिव मंगलदास भट तशेंच परिशदेचे कार्याध्यक्ष चेतन आचार्य आनी भांडारी शिरीष पै हाजीर आशिल्ले.
ह्या वेळार जाळवणदारांनी अधिवेशनाच्या तयारे विशीं म्हायती दिली. तशेंच वेगवेगळ्या विशयांचेर भासाभास जाली. अधिवेशनांत चडांत चड प्रतिनिधी वांटेकार जावचे पासत यत्न करपाचे नदरेन संपर्क करपाचें थारायलें. कला केंद्राचे अध्यक्ष सुरज कोमरपंत हांणी येवकार दिलो, जाल्यार प्रसाद पागी हांणी उपकार मानले. ह्या वेळार कमलाकर म्हाळशी, रमेश कोमरपंत, उल्हास पै भाटीकार, सुदेश नायक, जोफा गोन्साल्वीस, अजित पैंगीणकार, व्यंकटराय नायक तशेंच सुभाष कोमरपंत हांणी वेगवेगळ्या विशयांचेर भासाभास केली आनी मोलादीक सुचोवण्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
