भांगरभूंय | प्रतिनिधी
आंध्रांत दोना परस चड भुरगीं आसल्यार वेंचणूक लढोवंक मेळटली
हैदराबाद, खबरां संस्था: भारत लोकसंख्येचे बाबतींत पयल्या क्रमांकाचेर आसा. लोकसंख्येचेर नियंत्रण दवरपा खातीर जनसंख्या नियंत्रण धोरण आपणायल्लें. मात आतां देशांत जेश्ट नागरिकांचोय वाडत वचपी आंकडो आनी तरणाट्यांचो उणो जायत गेल्ल्या आंकड्याक लागून खंत उक्तायल्या. आंध्र प्रदेशाचे मुख्यमंत्री चंद्रबाबू नायडू हांणी जाहीरपणान ही चिंता उक्तावन नवें लोकसंख्या धोरण हाडपाचो निर्णय घेतला. राज्यांत तरणाट्यांचो आंकडो वाडोवपा खातीर दोन परस चड भुरगीं आशिल्ल्या परिवाराक उर्बा दितले. नव्या कायद्यांत दोन परस चड भुरगीं आशिल्ल्यांक वेंचणूक लढपाक मेळटली.
चंद्रबाबू नायडू हांणी सांगलें, दक्षीण भारतांत ज्येश्ठ नागरिकांचो आंकडो वाडतूच आसा. जपान, चीन आनी कांय युरोपीय देशांकूय ही समस्या आसा. हांगा जनसंख्येचो एक व्हड भाग ज्येश्ठ लोक आसात. तशेंच बर्यो संदी मेळिल्ल्यान तरणाटे विदेशांत वतात. दक्षीण भारतांत हे आव्हान चड आसा.आंध्र प्रदेशांतल्या खुबश्या गांवांनी जेश्ट नागरीकूच उरल्यात. तरणाटे शारांत गेल्यात. दक्षीण भारतांतलें प्रजनन दर १.६ टक्के देंवलां. राष्ट्रीय प्रजनन दर २.१ आसा. जर प्रजनन दर अशेंच देंवल्यार २०४७ मेरेन जेण्ठ नागरिकांचो आंकडो दुपेटीन वाडटलो.
जेश्ठ नागरिकांचो आंकडो वाडलो
भारतांत ज्येश्ठ नागरिकांचो आंकडो वाडला अशें केंद्राचे यूथ इन इंडिया-२०२२ रिपोर्टांत म्हणिल्लें. त्या अहवाला प्रमाण २०३६ मेरेन देशांतली ३४.५५ कोटी लोकसंख्या तरणाटे आसतले. ती सध्या ४७% परस चड आसा. सध्या देशांत २५ कोटी युवक १५ ते २५ वर्सां पिरायेचे आसात. मात फुडल्या पंदरा वर्सांनी हो आंकडो देंवतलो.
२०३६ मेरेन देशांत १२% परस चड जेश्ट नागरीक आसतले, अशें ज्येश्ठ राष्ट्र लोकसंख्या कोशच्या (णछऋझA) अहवालांत म्हणलां. इंडिया एजिंग रिपोर्ट २०२३ प्रमाण २०११ भारतीय लोकसंख्येची सरासरी पिराय २४ जाता. सध्या ती २९ जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
