भांगरभूंय | प्रतिनिधी
नवी दिल्ली, खबरां संस्था ः भारतान फाटल्या कांय वर्सांत लिम्फॅटिक फायलेरियासिस (हतीरोग) आडावपाचे नदरेन बरीच उदरगत केल्या. हालींच नॅशनल सेंटर फॉर वेक्टर बोर्न डिसीज कंट्रोल (NCVBDC) ह्या दुयेंसाक आडावपा खातीर 6 राज्यांतल्या 63 जिल्ह्यांक लक्ष्य करून मास ड्रग अॅडमिनिस्ट्रेशन (MDA) मोहीम सुरू केल्या. केरळ, तामिळनाडू, आंद्र प्रदेश, ओडिसा आनी मध्य प्रदेशांत ह्या दुयेंसांचो चड धोको आसा.
फायलेरिया हो एक संसर्गजन्य दुयेंस जो जराळ चाबल्यार पातळटा. हाका लागून द्रव सांठो जावंक शकता म्हळ्यार कुडीच्या खंयच्याय भागांत द्रव सांचून उरूंक शकता. जायत्या प्रकरणांनी हाका लागून विकृतताय वा दिव्यांग लेगीत जावं येता.
हें दुयेंस जाल्यार संबंदीत अवयव सुजून जड जाता. सादारणपणान हाका लागून पांय फुगता आनी खूब जड जाता. हाका लागून ताका हतीरोग वा हत्तीच्या पांयांचो दुयेंस अशेंय म्हण्टात. सामान्य भाशेंत ताका फायलेरियासिस म्हणटात. सध्या भारतांतल्या 74 कोटी लोकांक फायलेरियासिसाचो धोको आसा.
3.1 कोटी लोकांक फायलेरियासिस…
इंडियन जर्नल ऑफ पब्लिक हेल्थांत उजवाडाक आयिल्ल्या अहवाला प्रमाण भारतांतल्या सुमार 74 कोटी लोकांक फायलेरियासिसाचो धोको आसा. जाल्यार 3.1 कोटी लोकांक ह्या दुयेंसाची लागण जाल्या. तातूंतले सुमार 2.3 कोटी लोकां मदीं ताची लक्षणां दिसतात. ते भायर फायलेरियासिसची लागण जाल्ल्या पूण तांच्या कुडींत कसलीच लक्षणां दिसनात अशा लोकांचो आंकडो व्हड प्रमाणांत आसा. अशें आसून लेगीत तांची लिम्फॅटिक यंत्रणा आनी मूत्रपिंड अपेशी थारतात.
फायलेरियासिस जाल्यार….
१. पाय सदांच नितळ उदकान आनी साबणान धुवचें.
२. जमनीर चप्पल घालें बगर चलचें न्हय.
३. पाय पुसपाक नितळ मोव कपडो वापरचो.
४. सदां फावो तितलो व्यायाम करात.
५. दर म्हयन्यांतल्यान एकदा दोतोराक भेट दिवन कुडीची तपासणी करता.
६. स्तनांत कसलेय बदल जाणवता वा दुखता जाल्यार रोखडोच दोतोराचो सल्लो घेयात.
७. रावपाची आनी न्हिदपाची सुवात नितळ दवरात.
८. दुशीत उदक आनी कोयर घरां भोंवतणी एकठांय दवरु नाकात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
