भांगरभूंय | प्रतिनिधी
कौशांबी, खबरां संस्था: उत्तर प्रदेशांतल्या कौशांबी शारांत एक धक्को दिवपी घडणूक घडली. घोवाचे दीर्घायू खातीर करवा चौथचो उपास धरून एके बायलेन आपल्या घोवाच्या जेवणान वीख घालें. ते जेवण जेवन घोवाक मरण आयलें. शैलेश कुमार (३२) अशें मरण आयिल्ल्या तरणाट्याचें नांव.
आयतारा पुराय देशभर करवा चौथ मनयलो. करवा चौथच्या दिसा बायल आपल्या घोवाचे दीर्घायू खातीर उपास धरतात. शैलेश कुमार हाचे घरकान्नीनूय करवा चौथचो उपास दवरिल्लो. आयतारा सकाळ सावनूच शैलेश करवा चौथच्या विधीची तयारी करतालो. मात उपास सोडचे पयलींत त्या जोडप्या मदीं बरेंच व्हड झगडें पेटलें. मात, कांय वेळान परिस्थिती निवळ्ळी आनी शैलेश कुमार हाची घरकान्न सरिता जेवण रांदपाक लागली. उपास सोडल्या उपरांत तिणें आपल्या घोवाकूय रांदून वाडलें. मात तिणें घोवाच्या जेवणांत वीख घातलें. तें जेवण तिणें घोवाक जेवपाक दिलें आनी ती शेजार्यांगेर गेली. कांय वेळांतूच शैलेशची भलायकी इबाडली. कुटुंबीयांनी ताका हॉस्पिटलांत व्हेलो. मात, उपचारां मजगतीं ताका मरण आयलें. मात, मरणा पयलींच शैलेश हांणी व्हिडिओ रेकॉर्ड करून दवरिल्लो. ह्या व्हिडियोंत तांणी वीख घाल्ल्याचो आरोप केला. हे विशीं पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
