भांगरभूंय | प्रतिनिधी
कॅ नडा आनी भारताचे संबंद सुमारा भायर तणावाचे जाल्यात. कॅनडाचे प्रधानमंत्री जस्टीन ट्रुडो हांणी खलिस्तान फुटीरवादी फुडारी हरदीपसिंग निज्जर हाचे हत्येंत भारतीय गुप्तचर यंत्रणेचो हात आशिल्ल्याचो आरोप केला. इतलेंच न्हय जाल्यार भारतीय दुतावासांतले उच्चायुक्त संजय कुमार वर्मा हांचो हे हत्ये कडेन थेट संबंद जोडपाचो यत्न केला. कॅनडांतली एकूण परिस्थिती पळोवन भारतान कॅनडांतल्या आपल्या अधिकाऱ्यांक आपोवन नवी दिल्लीतल्या कॅनडाच्या उच्चायुक्त कचेरेंतल्या स अधिकाऱ्यांची हकालपट्टी केली. कॅनडान फाटल्या वर्साच हरदीपसिंग निज्जर हाचे हत्येंत भारताचो हात आशिल्ल्याचो आरोप केल्लो तेन्नाच हरदीपसिंग निज्जर हाचे हत्ये फाटल्यान भारताचो कसलोच हात ना अशें भारतीय विदेश खात्यान सांगिल्लें. उपरांत कांय काळ ओगी बशिल्ल्या ट्रुडोन परतून तीच खेळी करीत न्हय ताचे परस फुडली खेळी करीत ही कारवाय केली. कॅनडाचे हे कारवाये उपरांत भारतानूय कॅनडाच्या स वरिश्ठ अधिकाऱ्यांची हकालपट्टी करून जशाक तशी जाप दिली.
हे घडणुके उपरांत दोनूय देशां मदलो तणाव सुमारा भायर वाडला आनी ताका कॅनडाचे प्रधानमंत्री जस्टीन ट्रुडोच जापसालदार आसात. खलिस्तान ह्या फुटीरवादी संघटणेचेर भारतान बंदी घाल्या. पूण कॅनडान खलिस्तानाक कायम समर्थन दिलां. हेच संघटणेन भारताच्यो आदल्यो प्रधानमंत्री इंदिरा गांधी हांची हत्या घडोवन हाडली. भारता पसून वेगळें जावन स्वतंत्र खलिस्तान राष्ट्र निर्माण करप हें ह्या संघटणेची मोख आसा. 1980 च्या दसकांत ही संघटणा खूब आक्रमक आशिल्ली. ही संघटणा भारताच्या सार्वभौमत्वाकूच आव्हान दिता म्हूण भारतान तिचेर बंदी घाली. पूण आयजूय ह्या फुटीरवादी संघटणेचें काम चालूच आसा. हे संघटणेक विदेशांतल्यान चड करून कॅनडा ह्या देशांतल्यान अर्थीक आनी सामरीक मजत मेळटा. 1980 च्या दसकांत जेन्ना खलिस्तान चळवळ गतींत आशिल्ली तेन्ना सावनूच कॅनडांतल्यान तांकां अर्थीक मजत मेळटाली. आयज 40 वर्सां उपरांतूय परिस्थिती बदल्ली ना. आयजूय कॅनडा सरकार खलिस्तानाचें उक्तेंपणान समर्थन करता. कॅनडाचे प्रधानमंत्री जस्टीन ट्रुडो हे उक्तेंपणान खलिस्तानवाद्यांचें समर्थन करतात. तांच्या मंत्रीमंडळांत खलिस्तान समर्थक मंत्र्यांचो आस्पाव आसा.
अमृतपाल सिंग ह्या खलिस्तानी आतंकवाद्याक भारतान अटक केले उपरांत विदेशांतले खलिस्तान समर्थक कॅनडांत एकठांय आयल्यात. कॅनडांत भारता आडच्यो कारवायो पळोवन प्रधानमंत्री नरेंद्र मोदी हांणी ट्रुडो हांकां भारत विरोधी खलिस्तानवाद्यांचेर कारवाय करपाची मागणी केली. पूण ट्रुडो हांणी प्रधानमंत्र्यांचे मागणी कडेन आडनदर केली. इतलेंच न्हय जाल्यार फाटल्या वर्सा टोरोंटो आनी ओंटोरिया ह्या शारांत खालसा स्थापणूक दिसाचे कार्यावळीक तांणी हाजेरी लायली. थंय तांकां खलिस्तानाचो बावटो दिवन येवकार दिलो. ट्रुडो हांचे हे भुमिकेचेर सरकारान खर उतरांनी निशेध केलो. पूण भारताच्या निशेधा कडन ट्रुडोन आडनदर करून खलिस्तानाक समर्थन दिवपाचें चालूच दवरलां.
ट्रुडो हांची खलिस्तानवाद्याक समर्थन दिवपाची फुटीरतावादी भुमिका म्हणल्यार भारता आड दुस्मानाची भावना आसा. वास्तवीक भारतान कॅनडा बरोबर सदांच इश्टागतीचे संबंद दवरल्यात. भारत कॅनडाक इश्टूच मानता. पूण कॅनडा फुटिरांक फाटबळ दीत आसा, ताका लागून भारतान हाची गंभीरपणान नोंद घेवन कॅनडाक शिटकावणी दिल्या. ताका लागूनच जस्टीन ट्रुडो हांणी हरदीपसिंग निज्जर हाचे हत्येचें भांडवल करून भारता कडली दुस्मानकाय ओडून घेतल्या. अर्थांत कॅनडा हें एकल्याच्या बळार करिना हें उक्तें आसा. कॅनडाक कांय देशांचो लिपचोरयां तेंको आसा. पाकिस्तानानूय ह्या वादांत उडी घेवन कॅनडाक तेंको दिला. सेगीत हो वाद वयर काडपा फाटले जस्टीन ट्रुडो हांचो राजकी सुवार्थ आसा. फुडल्या वर्सा कॅनडांत वेंचणूक जातली. ट्रुडो हे परतून वेंचणुकेक उबे रावतले. पूण परिस्थिती तांकां अनुकूल ना. बेरोजगारी, म्हारगाय हाका लागून तांचे विशीं थंयच्या लोकां मदीं सुमारा भायर निरशेणी आसा. वेंचणुके आदल्या सर्व्हेक्षणांत तांचो पक्ष फाटीं पडत आशिल्ल्याचें दिसून येता. ताका लागून कॅनडांत आशिल्ले साडेसात लाख शीख नागरिकांची मतां आपले वटेन येवचीं हे खातीर तांणी परतून हो वाद वयर काडला.
तशें पळोवंक गेल्यार हे हत्ये फाटल्यान भारताचो हात ना अशें भारतान स्पश्ट केल्लें आसून लेगीत ट्रुडो हाचे वेल्यान भारता कडेन सेगीत वाद वयर काडीत आसात. वास्तवीक खलिस्तान ही फुटीरवादी संघटणा आसा. ती भारताच्या सार्वभौमत्वाक आव्हान दिता. भारताच्या सार्वभौमत्वाक आव्हान दिवपी वा फुटीरवाद्यांक फाटबळ दिवपी आमचे इश्ट जावंक शकनात अशें भारतान कॅनडाक ठणकावन सांगूंक जाय.
जो मेरेन कॅनडा फुटीरवाद्यांक समर्थन आनी फाटबळ दिवपाचें थांबयना तो मेरेन दोनूय देशांतले संबंद पयलीं भशेन जावचे नात अशी भारतान ठोस भुमिका घेवंक जाय. इतलेंच न्हय जाल्यार आंतरराष्ट्रीय पांवड्यार लेगीत हो मुद्दो उबारून धरूंक जाय.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
