हरवळें पंचायतीचेर भाजपाची सत्ता

भांगरभूंय | प्रतिनिधी

आदर्श पंचायत, मतदारसंघ घडोवपाक पालव दिवचो : मुख्यमंत्री

दिवचल, प्रतिनिधी: हरवळें पंचायत वाठारांतल्या पांचूय प्रभागांनी मुख्यमंत्री डॉ. प्रमोद सावंत हांच्या उमेदवारांनी जैत मेळयलें. मुख्यमंत्र्यांनी जैतिवंत उमेदवारांक हार घालून परबीं भेटयलीं. आदर्श पंचायत आनी मतदारसंघ घडोवपाक सगळ्यांनी पालव दिवचो आनी कार्यरत रावपाचो तांणी उलो मारलो.
हरवळें पंचायतींत आयतारा ९१.१८ टक्के मतदान जालें. सोमारा मतमेजणी मामलेदार कार्यालयांत जाले उपरांत निकाल जाहीर केलो. प्रभाग नंबर एकच्यान देमगो गांवकार हे पयलींच विरोधा विणें वेंचून आयिल्ले. जाल्यार प्रभाग नंबर दोनच्यान अजय मळी हाका २२२ मतां, प्रभाग तीनच्यान ममता महेश दिवकार १८८ मतांनी, प्रभाग चारांतल्यान गौरवी गुरुप्रसाद नायक ३६७ मतांनी, प्रभाग नंबर पांचांतल्यान अस्मिता अंकुश मळीक २५५ मतांनी जैतिवंत जालीं. निर्वाचन अधिकारी प्रवीण गांवस आनी उपनिर्वाचन अधिकारी दत्तात्रय परब हांणी जैतिवंतांचें नांव जाहीर केलें.

जैतिवंत उमेदवारांक निर्वाचन अधिकारी प्रवीण गांवस हांचे हस्तुकीं अधिकृत प्रमाणपत्र भेटयलें. जैतिवंत उमेदवारांक कार्यकत्यांनी फुलांचे हार घालून आनी गुलाल मारून परबीं भेटयलीं. तशेंच मिरवणूक काडून जैत मनयलें.
मुख्यमंत्री डॉ प्रमोद सावंत हांणी सगळ्या जैतिवंतांक फुलांचे हार घालून परबीं भेटयलीं. ह्या वेळार सुलक्षणा सावंत हाजीर आशिल्ली.
भारतीय जनता पार्टी उदरगती खातीर बांदील आसा. दरेका घटकाची उदरगत करतना गांव, शार, पंचायत, पालिका ह्या सगळ्या मळांचेर केंद्र आनी राज्याच्यो येवजण्यो घराघरांनी पावोवपाचो संकल्प करून कार्यरत आसा. पंचायत वांगड्यांनी उदरगतीचे प्रक्रियेंत आपलें योगदान दिवन, दरेका घरांत येवजण्यो कश्यो पावोवपाच्यो हाचे कडेन लक्ष दिवचें. सरकारा वतीन पंचायत मंडळांक सगळे तरेचें सहकार्य मेळटलें. आयज परत भाजपान पुरायेन भोवमत मेळोवन खोस आनीक वाडयल्या अशें मुख्यमंत्री डॉ. सावंत हांणी सांगलें.
ह्या वेळार उमेदवारांनी प्रतिक्रिया उक्तायतना, मुख्यमंत्री सावंत, सुलक्षणा सावंत, तशेंच सगळ्या कार्यकर्त्त्यांनी सहकार्य केल्ल्यान जैत फावो जालें. जनतेच्या विस्वासाक पात्र थारपी कामगिरी आमी सगळीं एकवटान करुया, अशें सांगलें.