भांगरभूंय | प्रतिनिधी
गांदरबल, खबरां संस्था: जम्मू-काश्मीरांत आतंकवादी हल्ल्याच्यो घडणुको सेगीत उजवाडाक येवपाक लागल्यात. आतां परत एक फावट जम्मू-काश्मीरांतल्या गांदरबल जिल्ह्यांतल्या गगनगीर वाठारांत आयतारा रातीं आतंकवाद्यांनी हल्लो केल्ल्याची म्हायती उजवाडाक आयल्या. ह्या हल्ल्यांत सात जाणांक मरण आयलें. तशेंच जायते जाण गंभीर जखमी जाले.
गांदरबल जिल्ह्यांतल्या गगनगीर सोनमर्ग हांगा जोडपी झेड-मोर बोगद्यांत कांय कामगार काम करताले. मात, हें काम करतना अचकीत आतंकवाद्यांनी हल्लो केलो. ह्या हल्ल्यांत काम करपी सात जाणांक मरण आयलें. हातूंत एक दोतोर आनी स स्थलांतरीत कामगार आसात. उपरांत जवानांनी घडणुके सुवातेर दाखल जावन आतंकवाद्यांचो सोद घेवपा खातीर सर्च ऑपरेशन सुरू केलें.
दोन जवानांचें अपहरण केल्लें
जम्मू-काश्मीरांतल्या अनंतनाग जिल्ह्यांतल्यान आतंकवाद्यांनी भारतीय सैन्याच्या दोग जवानांचें अपहरण करपाची घडणूक कांय दिसां आदीं घडिल्ली. ८ ऑक्टोबराक टेरिटोरियल आर्मीच्या १६१ पंगडाचे दोन सैनिक अनंतनागांतल्या रान वाठारांत आतंकवाद विरोधी कारवाय करतना गस्त घालताले. त्या वेळार ह्या दोग जवानांचें आतंकवाद्यांनी अपहरण केल्लें. ह्या दोगां जवानांतलो एक जवान कसोय तरी आतंकवाद्यांच्या चपक्यांतल्यान सुटपाक येसस्वी जाल्लो. पूण भारतीय सैन्याक आनीक एका जवानाची कूड रानांत मेळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
