भांगरभूंय | प्रतिनिधी
बे कारी वाडत चल्ल्या, हें सगल्यांक खबर आसा. तरी लेगीन आमी यत्न करपाकूच जाय. फाटल्या लेखांत आमी एलआयसी एजंट कसो जावप, ताचे फायदे हाची म्हायती घेतली. एलआयसी मित्रूय जावपाची तुमकां संद आसा. गोंयांतूच तुमकां नोकरी जाय जाल्यार तुमचें सपन पुराय जावं शकता. खेरीज ही नोकरी सरकारी. तुमी जर सुरक्षेचे नदरेन पळयतात जाल्यार तीय इत्सा पुराय जावं येता. एलआयसीचे वेबसायटीक जर तुमी भेट दियशात जाल्यार तुमकां हाची म्हायती मेळटली. परीक्षा मात दिवची पडटा, हें विसरूंक फावना. गोंय फांट्याचो विचार केल्यार रेकाॅर्ड क्लार्क अधिकारी, सफाई कामगार
सारक्या उमेदवारांची भरती जावपाची आसा. लागीं लागीं दरेका तालुक्यांत फांटे आशिल्ल्या कारणान थंय तुमी चवकशी करपाक शकतात. तुमी जर पदवी घेतल्या, जाल्यार सल्लागार म्हणून काम करपाक शकतात.
विमो एजंट पिंगुळकार हांणी उमेदवारांनी नेमान वेबसायट पळोवपाक जाय, अशें सांगिल्लें. तुमी विमो एजन्सी घेवन नोकरी, वेवसाय सांबाळून लोकांची सेवा करूं शकतात. तशेंच एलआयसीच्या विवीध येवजण्यांचो लाव घेवपाक शकतात. एलआयसी साबार सर्ती आयोजीत करतात, तातूंय वांटेकार जावं शकतात. विकास अधिकारी, सहायक अधिकारी, रेकाॅर्ड क्ला, उप कर्मचारी, अस्थायी उप कर्मचारी, सफाई कामगार अश्यो सुवाती गोंयांत भरपाच्यो आसात. तुमी वेबसायटीक भेट
दियशात वा लागींच्या एलआयसी कार्यालयांत वच्चशात जाल्यार
तुमकां चड म्हायती मेळूं शकता. दिसाळ्यांनी जायराती येतात, त्यो सगल्यांकूच वाचपाक मेळटात अशें ना. ताका लागून वेबसायटीक
भेट दिवप बरें. तमकां परिक्षा दिवची पडटा, तिचीय म्हायती ताचेर आसता. जांकां उलोवपाची कळाशी आसा, लोकांक मेळपाक आवडटा, भोंवपाची आवड आसा, समाजीक सेवेची आवड आसा, तांणी एलआयसी एजंट जावप बरें. तुमकां वेगवेगळ्यो येवजण्यो लोकां मेरेन पावोवन तांकां मजत करूं येता. तुमचोय फायदो जातलो. ही कंपनी सरकारी आशिल्ल्यान तुमकां भिवपाची गरज ना.
एलआयसीच्यो येवजण्यो, नेम बदल आसतात. 32 तरी येवजण्यो बदल्ल्यात अशी म्हायती एलआयसी एजंटा कडेन मेळूं शकता. दर म्हयन्याक, दर वर्सा हप्तो भरपाची येवजण एलआयसी कडेन आसा. आपूण नासत जाल्यार फाटल्यान कोणाचें लुकसाण जावंक फावना ही नदर ते फाटल्यान आसताच, पूण तुमची बचतूय जाता. हो म्हाका दिसता व्हडलो लाव. नाजाल्यार सहसा कोण बचत करपाक वचना. मागीर नाका थंय पयशे मोडटात. कांय कडेन आमकां खूब जोड जाता, पूण ताचेच वांगडा आमी विमो काडपाक विसरचें न्हय. प्रत्येकान विमो हा काडपाकूच जाय. www.licindia हें संकेतस्थळ जरूर पळेयात. प्रशासकी अधिकाऱ्याची परिक्षा, आयबीपीएस सारकी परिक्षा दरेका दोन वर्सांनी आसता, त्यो आॅनलायन आसता. ताचीय चवकशी करात. ते खातीर तुमी विलास आजगांवकार हांकां 80078 78989 ह्या क्रमांकाचेर फोन करून म्हायती विचारुंक शकतात.
अग्नीवीर सैनीक
वता वतां, अग्नीवीर खातीर देशभरांत 46,000 उमेदवार घेवपाचे आसात. हाचे पयलीं हे लेखमाळेंत हाची म्हायती दिल्ली. पूण परत एक फावट दितां. तुमकां चार वर्सां प्रशिक्षणा सयत लश्करांतल्या सैनिकाचें काम करचें पडटलें. आठवी, धावी तशेंच बारावेचे उमेदवार, जांची पिराय 17 ते 23 वर्सां आसा, ते आॅनलायन अर्ज करपाक शकतात. चार वर्सां जालीं काय तुमच्या हातांत 11 लाख 71 हजार रुपया पडटले. खेरीज खंयच्याय सरकारी फांट्यांत नोकरे खातीर 10 टक्के आरक्षण आसतलें. थंय तुमी नोकरी करपाक शकतात.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
