भांगरभूंय | प्रतिनिधी
नवी दिल्ली, खबरां संस्था: दिल्लीच्या प्रशांत विहार वाठारांत आयज सकाळीं व्हड स्फोट जालो. ह्या स्फोटाच्या आवाजाक लागून थळाव्या लोकां मदीं भंयाचें वातावरण निर्माण जालां. केंद्रीय राखीव पुलीस दळाचे (सीआरपीएफ) शाळे लागसार हो स्फोट जालो. स्फोटा उपरांत सगळे वटेन धुंवर जाल्लो.
पुलीस उपायुक्त अमित गोयल हांणी हे घडणुकेची म्हायती दितना सांगलें, आमी ह्या स्फोटाचें कारण सोदून काडपाचो यत्न करतात. हे खातीर तज्ञांचो पंगड आपयला. हो स्फोट कित्याक लागून जालो तें अजून स्पश्ट जावंक ना. ह्या वाठारांत पुलिसांचो व्हडलो पंगड तैनात केला. तज्ञांचो पंगड चवकशी उपरांत ह्या प्रकरणाची म्हायती दितलो.
सकाळीं ७.५० वरांचेर हो स्फोट जालो
थळाव्या लोकांनी सकाळीं ७.५० वरांचे सुमाराक उजो पालोवपी दळाक स्फोटाची म्हायती दिली. ते उपरांत उजो पालोवपी दळाच्यो दोन गाडयो थळार आयल्यो. उजो पालोवपी दळान हांगची तपासणी केली. थंय खंयच उजो वा इमारतींक कसलेंच लुकसाण जावंक नाशिल्ल्याचें दिसून आयलें.
सुरवातेक हो सिलिंडराचो स्फोट आसूं येता असो अदमास आशिल्लो. पूण चवकशेंतल्यान हो सिलिंडराचो स्फोट न्हय अशें समजलें. तशेंच पुलीस वाठाराची सीसीटीव्ही फुटेज तपासतात. चवकशेक नेट आयला. हे विशीं पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
