भांगरभूंय | प्रतिनिधी
नवी दिल्ली, खबरां संस्थाः ज्येश्ठ नागरिकां खातीर जिवीत विमो आनी भलायकी विमो प्रीमियमाचेर वस्तू आनी सेवा कराचेर (जीएसटी) सुट दिवपाची शक्यताय आसा अशें एका अधिकार्यान शेनवारा सांगलें. हे संबंदी एक प्रस्ताव शेनवारा जाल्ले मंत्रीमंडळ बसकेंत दिल्लो आनी फुडल्या म्हयन्यांत जावपी जीएसटी परीशद बसकेंत निमाणो निर्णय घेवपाची शक्यताय आसा. सध्या विम्याच्या हप्त्यांचेर १८ टक्के दरान जीएसटी घेतात.
ज्येश्ठ नागरिकां भायर भलायकी विम्याच्या हप्त्यांचेरूय पांच लाखां मेरेन जीएसटींत सुट दिवपाचोय मंत्रीमंडळान निर्णय घेतला. पूण ते रक्कमे परस चड विमो हप्त्यांचेर १८ टक्के जीएसटी लागू जातली. हे संबंदी निमाणो निर्णय जीएसटी कावन्सिलांत घेतले अशी म्हायती अधिकार्यांनी दिली.
केंद्रीय अर्थमंत्री निर्मला सीतारमण ही हे परिशदेची अध्यक्ष आसून तातूंत सगळ्या राज्यांचे अर्थमंत्री आसतात. फुडल्या म्हयन्यांत परिशदेची बसका जातली.
मंत्रीमंडळ समन्वयक आनी बिहाराचे उपमुख्यमंत्री सम्राट चौधरी हांणी म्हणलें, मंत्रीमंडळांतल्या दरेका वांगड्याक लोकांक थाकाय दिवपाची इत्सा आसा. ज्येश्ठ नागरिकांचेर खासा लक्ष दिवपाचें काम सुरू आसा. आमी आमचो अहवाल जीएसटी कावन्सिलाक सादर करतले. निमाणो निर्णय ते घेतले.’’पूण विम्याची रक्कम पळोवन ज्येश्ठ नागरिकांक ताचे खातीर दिल्ल्या हप्त्यांचेर जीएसटींत पुराय सुट दिवंक मेळटा.
जीएसटी कावन्सिलान फाटल्या म्हयन्यांत जाल्ले बसकेंत भलायकी आनी जिवीत विमो हप्त्यांवेल्या कराचेर निर्णय घेवपा खातीर १३ वांगड्याचो मंत्र्यांचो गट तयार करपाचो निर्णय घेतिल्लो. ह्या मंत्र्यांच्या पंगडांत उत्तर प्रदेश, राजस्थान, अस्तंत बंगाल, कर्नाटक, केरळ, आंध्र प्रदेश, गोंय, गुजरात, मेघालय, पंजाब, तमिळनाडू, तेलंगना ह्या राज्यांतले मंत्री आसतात. ह्या म्हयन्याचे निमाणे मेरेन मंत्रीमंडळान आपलो अहवाल जीएसटी कावन्सिलाक दिवप बंधनकारक आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
