भांगरभूंय | प्रतिनिधी
दुबावीत मॉवीन फर्नांडीस ड्रग्सा खातीर करतालो चोरी
भांगरभूंय । प्रतिनिधी
म्हापशें: ड्रग्साच्या व्यसना खातीर पयशे जाय म्हूण गोमॅकाँत तशेंच गोंयांतल्या हेर हॉस्पिटलांनी दुयेंतींच्या घरच्यांचे मोबायल फोन चोरपी दुबावीत खांप्या चोर मॉवीन फर्नांडीस (29. रा. चिंचणी, कुंकळ्ळी) आगशी पुलिसांनी अटक केली. ह्या चोरी प्रकरणांतलो तो मुख्य दुबावीत आसा. ताचे कडल्यान देड लाखाचे 10 मोबायल फोन जप्त केल्यात.
बांबोळे गोमॅकाँतल्या वॉर्डा भायर वेटींग सुवातेर राती वेळार सुसेद घेवपी दुयेंतींच्या घरच्यांक दुबावीत मॉवीन फर्नांडीस लक्ष्य करतालो. फांतोडेच्या आदेसाक दुबावीत हॉस्पिटलांत येतालो आनी सुस्त न्हिदेंत आशिल्ल्या लोकांचे मोबायल फोन फारायतालो. गोमॅकाँत मोबायल चोरयेक वचपाचे खूबशे प्रकार घडिल्ले. तशेंच म्हापशें, मडगांव आनी फोंडेंया जिल्हो हॉस्पिटलांनी लेगीत दुयेंतींच्या घरच्यांचे मोबायल फोन आनी पर्सी चोरयेक गेल्यात. हाका लागून ह्या हॉस्पिटलांचे सुरक्षा वेवस्थेचेर लोक प्रस्नचिन्न उपस्थीत करतात.
गोमॅकाँतल्यान मोबायल फोन चोरयेक गेल्ल्यो कागाळी आगशी पुलिशेंत दाखल जाल्ल्यो. ते प्रमाण पुलिसांनी चोरयेक गेल्ले मोबायल ट्रॅकराचेर दवरिल्ले. हे मोबायल फोन आसाम आनी पश्चीम बंगालांतले आशिल्ल्याचें दिसून आयलें.
बिरेस्तारा 17 ऑक्टोबराक अशीक एक कागाळ पुलिशेंत दाखल जाली. ते प्रमाण पुलिसांनी चवकशी सुरू केली आनी दुबाविताक शेनवारा 19 ऑक्टोबराक धरून अटक केली. दुबाविता कडल्यान चोरयेचे 10 मोबायल फोन पुलिसांनी जप्त केले. जप्त केल्ल्या मोबायल फोनांचें मोल सुमार देड लाख आसा.
मजगतीं, दुबाविता कडल्यान चोरयेचे मोबायल फोन खरेदी करून उपरांत ते पश्चीम बंगाल आनी आसामांतल्या लोकांक विकपी मनशाक पुलीस सोदतात. पुलीस अधिक्षक अक्षत कौशल, उपअधिक्षक सुदेश नायक हांच्या मार्गदर्शना खाला निरिक्षक अनंत गांवकार, उपनिरिक्षक स्वप्नील नायक, शुभंम कोरगांवकार, कॉन्स्टेबल राघोबा पार्सेकार, राजू अत्तर, संकेश मांद्रेंकार आनी संजय वरक ह्या पंगडान ही कामगिरी केली.
दुबाविता आड वट्ट 16 गुन्यांव नोंद
दुबावीत मॉवीन फर्नांडीस हाचे आड कुंकळ्ये 3, आगळी 2, मजगांव टावन 4, म्हापशें 2, पेडणें 2, कळंगूटे 1, पणजी 1, मायणा कुडटरी 1 अशे वट्ट 16 गुन्यांव नोंद आसात. हे गुन्यांव दुबावितान 2007 ते 2024 ह्या काळांत केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
