भांगरभूंय | प्रतिनिधी
22 ऑक्टोबराक सुनावणी
पणजी ः बेकायदेशीर बांदकामां आड कारवाय करपा खातीर कांय पंचायतींच्या निश्काळजीपणाक लागून आतां राज्यांतल्या सगळ्याच पंचायतींचेर ताचो परिणाम जातलो. बेकायदेशीर बांदकामांची गंभीर दखल घेवन उच्च न्यायालयान स्वेच्छा याचिका दाखल केल्या. सरकार आनी पंचायत संचालनालयाक प्रतिवादी केल्यात आनी 22 ऑक्टोबराक सुनावणी जातली.
एके रातींत बेकायदेशीर बांदकाम उबे करपाचो प्रकार गंभीर आसा. बेकायदेशीर बांदकाम चालू उरल्यार गोंय नश्ट जावपाक चड वेळ लागचो ना अशें उच्च न्यायालयाचे मुखेल न्यायाधीश देवेंद्र कुमार उपाध्याय हांणी म्हणलें. राज्याचे अॅडव्होकेट जनरल देवीदास पांगम हांणी ही म्हायती दिली.
राज्यांतल्या म्हामार्गांचेर आनी रस्त्या कुशीक बेकायदेशीर बांदकाम उबारपाक लागल्यात. पंचायतींतूय बेकायदेशीर बांदकामांचे प्रमाण वाडला. बेकायदेशीर बांदकामां आड कारवाय करपाचो आदेश न्यायालयान दिल्या उपरांत लेगीत कांय पंचायतींनी कारवाय करूंक ना. धा बांदकामां आड दिल्ल्या आदेशाची करवाय पंचायतींन करूंक ना. बेकायदेशीर बांदकामा चालूच उरली जाल्यार गोंयचो नाश जावपाक चड वेळ लागचो ना. हे खातीर उच्च न्यायालयान बेकायदेशीर बांदकामा संबंदी स्वेच्छा याचिका दाखल केल्या. पंचायत संचालनालय, राज्य सरकार हें याचिकेंत प्रतिवादी आसा. हाचे भायर आनीक कोणाक प्रतिवादी करचे हाचो निर्णय सुनावणी वेळार जातलो.
बेकायदेशीर बांदकामां जायत्या पंचायत वाठारांनी चालू आसात. स्वेच्छा याचिकेक लागून आतां राज्यांतल्या जायत्या पंचायतींक उच्च न्यायालयाचे कारवायेक सामकार वच्चें पडटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
