माशेल महिला सोसायटी भानगड ः संचालक मंडळाचेर कारवाय करपाची मागणी

भांगरभूंय | प्रतिनिधी

माशेल ः माशेल महिला को-ऑपरेटिव्ह सोसायटीचे ठेवीदार परतून आक्रमक जाल्यात. अर्थीक भानगड करपी संचालक मंडळाचेर कायदेशीर कारवाय करून ठेवीदारांक तांचे पयशे परत करपाची अशी मागणी ते मुख्यमंत्र्या कडेन करतात. हे बँकेंत 90 टक्क्यां परस चड ठेवीदार ज्येश्ठ नागरिक आनी बायलो आसात.
मजगतीं, सहकारी सोसायटीच्या निबंधकान नेमिल्ले समिती 2023-24 अर्थीक वर्सा फकत 2 लाख रुपया वसूल करूंक शकतली. आतां मेरेन वसुली जाल्ली रक्कम 9 लाख रुपया आसा. सहकारी सोसायटीच्या रजिस्ट्रारच्या ऑडिट अहवाला प्रमाण, ‘वट्ट उरिल्ली रिणाची रक्कम 8,34,98,187 रुपया आसा, तातूंतले 3,12,50,990 रुपया वीज उपकरणां खरेदी करपा खातीर मंजूर केल्ले. ही रक्कम परस्पर माशेल महिला को-ऑपरेटीव्ह सोसायटीच्या अध्यक्षाच्या घोवाच्या मालकीच्या ‘सातोस्कर इलॅक्ट्रॉनिक्सा’च्या खात्यांत हस्तांतरीत केली.’
सहकारी सोसाटीच्या निबंधकान नेमिल्ल्या खाशेल्या ऑडीट पंगडान दिल्ले म्हायती प्रमाण ह्या भानगडीत सोसायटीचें संचालक मंडळ पुरायपणान जापसालदार आसा. सोसायटीच्या नेमांक पाळो दिनायतना ताणी सोयीस्कर रितीन रीण दिलें. देखून वांटिल्ली रिणाची रक्कम कायदेशीर मार्गान संचालक मंडळा कडल्यान वसूल करची अशें तातूंत म्हणलां.
मजगतीं, बसकेंत हाजीर आशिल्ल्या जायत्या जाणांनी सांगलें, सोसायटीच्या नेमांक आडनदर करून बँकेचे वांगडी लेगीत नाशिल्ल्या तांच्या सोयऱ्यांक 5 लाख रुपया मेरेन रीण दिलें. तशेंच ताची नोंद लेगीत खंयच ना. मजगतीं, 2021 वर्सा सहकारी संस्थांच्या रजिस्ट्रारान सोसायटीच्या संचालक मंडळाच्या वांगड्यांची सगळी मालमत्ता जप्त करून ठेवीदारांचे पयशे बेगोबेग परत करचे अशें सांगिल्लें, पूण ताचेर कांयच जाले ना अशें. ह्या प्रकरणांत सोसायटीच्या वेवस्थापक आनी संचालक मंडळा आड कारवाय करची अशेंय एकल्यान सांगलें.
मजगतीं, ह्या प्रकरणांत रितसर कागाळ नोंद करून लेगीत सरकारान कसलीच कारवाय करूंक नाशिल्ल्याचे मुखार आयलें. ह्या भनगडीत सहकारी संस्थांचे निबंधक जापसालदार आसा. तांणी योग्य वेळार ऑडिट करुंक ना. 2019 वर्साचो ऑडिट अहवाल 2022 वर्सा उपलब्ध केल्लो. योग्य वेळार ऑडिट करून त्याच वेळार अहवाल सादर केलो जाल्यार त्याच खिणाक ही भानगड सुदारूं येता आसली अशें एका ज्येश्ठ नागरिकान सांगलें.
2019 वर्साचो अहवाल 2022 वर्सा जारी केलो…
विशेश म्हळ्यार 31 मार्च 2019 मेरेनच्या नोंदी प्रमाण ‘पिग्मी’ च्या वसुली एजंटांनी सोसायटीच्या खात्यांत 24,08,674 रुपया रक्कम जमा करूंक नाशिल्ली. ताच्या ह्या निश्काळजीपणाक लागून ‘पिग्मी’ भरपी सामान्य वेपाऱ्यांक व्हड लुकसाण सोंसचें पडटा. हो अहवाल 2022 वर्सा जारी केलो.
ज्येश्ठ नागरिकांक, ल्हान वेवसायांक, उद्देजक बायलांक आनी हेरांक फाटलीं तीन वर्सां हाचो खर धपको बसला. आतां ह्या भानगडीक जापसालदार आशिल्ल्या पिग्मी एजंटांक, वेवस्थापकांक, संचालक मंडळाक आनी सोसायटीच्या सवलतींचो चुकीचो फायदो घेतिल्ल्या लोकांचेर कायदेशीर कारवाय करुन हे प्रकरण सुटावे करचे अशी मागणी आशिल्ल्या ठेवीदरांनी केली.