भांगरभूंय | प्रतिनिधी
मनशाक दोन हात आसतात. एकाक प्रायमरी आनी दुसऱ्याक सेकंडरी म्हण्टात. प्राथमीक म्हळ्यार उजवो आनी सेकंडरी म्हळ्यार डावो. संवसारीक भलायकी संघटनेच्या म्हणण्या प्रमाण संवसारभर फकत धा टक्के लोक आपलो डावो हात बरोवप, जेवप आनी हेर कामां खातीर वापरतात. जाल्यार ९० टक्के लोक आपलो उजवो हात वापरतात. हालींच डाव्या हाताच्या लोकांचेर एक सोशेधन केला. तांतूत ह्या लोकांक जायत्या दुयेंसांचो चड धोको आशिल्ल्याचें दिसून आयलां.
जर्नल ऑफ पब्लिक हेल्थाच्या एका अभ्यासांत डाव्या हाताच्या लोकांक हेरां परस भलायकी समस्यांचो धोको चड आसता अशें दिसून आयलां. संशोधकांक तांच्या संशोधनांत दिसून आयलां की, कांय परिस्थितींत डाव्या हाताच्या लोकांक दुयेंसाचे प्रमाण चड आसता. हाका जायती कारणा आसात. तातूंतलें पयलें कारण म्हळ्यार आनुवंशिक कारण म्हळ्यार आनुवंशिक समस्या. तेभायर ब्रेन कनेक्टिव्हिटी आनी पर्यावरणीय कारणा हाका कारणीभूत थारुंक शकता.
स्तनाच्या कॅन्सराचो धोको चड
उजव्या हातान काम करपी बायलां परस डाव्या हातान काम करपी बायलांक स्तनाच्या कॅन्सराचो चड धोको आसता अशें संशोधनांतल्यान दिसून आयलां. डाव्या हातान काम करपी बायलांक स्तनाच्या कॅन्सराचो धोको गुरवारपणांत एस्ट्रोजनाच्या चड संपर्कांत येवपाक लागून आसूं येता अशें संशोधकांनी सांगलें. संवसारभरांत डाव्या हाताचो वापर करपी बायलां मदींय कॅन्सराचे चड प्रमाण दिसून आयलां.
स्किझोफ्रेनिया
डाव्या हाताचो वापर करपी लोकांक स्किझोफ्रेनिया (गंभीर मानसीक दुयेंस) जावपाची चड शक्यताय आशिल्ल्याचें ह्या अभ्यासांतल्यान स्पश्ट जालां. 2019, 2022 आनी 2024 वर्सा हे संबंदीं खूब संशोधनां जाल्यात. डाव्या हाताच्या लोकांक स्किझोफ्रेनिया चड प्रमाणांत आसूं येता.
मानसीक भलायकी
हाचे वांगडाच डाव्या हातान काम करपी लोकांक मानसीक भलायकेच्या जायत्या समस्यांचो धोको आशिल्ल्याचें दिसून आयलां. उजव्या हाताच्या लोकांपरस मूड स्विंग, हुस्को, अस्वस्थताय, चिडचिडेपण, पोस्ट ट्रॉमॅटिक स्ट्रेस डिसऑर्डर ह्यो समस्या डाव्या हाताच्या लोकां मदीं चड प्रमाणांत दिसतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
