भांगरभूंय | प्रतिनिधी
नवी दिल्ली, खबरां संस्था ः इंडियन काउन्सिल ऑफ मेडिकल रिसर्च (ICMR) हे संस्थेन क्षयरोग सोदून काडपा खातीर नवें हॅन्डहेल्ड एक्स-रे उपकरण तयार केलां. ह्या उपकरणाच्या मजतीन टीबी चांचणी उण्या वेळांत सहजपणान करूं येता. आयसीएमआरचे महासंचालक डॉ. राजीव बहल हांणी वखदां नियामक प्राधिकरणांच्या भारत -2024 च्या 19व्या आंतरराष्ट्रीय परिशदेंत सांगलें, टीबी सोदून काडपा खातीर नवें हँडहेल्ड एक्स-रे उपकरण तयार केलां जाका लागून हो दुयेंस बेगीन कळटलो आनी ताचेर वेळार उपचार करप शक्य जातले.
मायकोबॅक्टेरियम ट्यूबरक्युलोसिसाक लागून टीबी जाता. ताचो सोद १८८२ वर्सा जर्मन शास्त्रज्ञ रॉबर्ट कोच हाणें लायलो. भारतांत टीबीचेर उपचार सहजपणान मेळटात, पूण अजूनय ह्या दुयेंसाचो आंकडो वाडत आसा. हाचें मुखेल कारण म्हळ्यार चडशा लोकांक टीबीची लक्षणां कळना. कुडींत हो दुयेंस गंभीर जाता तेन्ना लोक उपचारा खातीर वतात. देखूनूच आतां हँडहेल्ड एक्स-रे उपकरणाक लागून हो दुयेंस बोगीन वळखुपाक मजत जातली.
संवसारीक भलायकी संघटनेच्या म्हणण्या प्रमाण, भारतांत दर वर्सा टीबीच्या दुयेंतींचो आंकडो वाडटा. 2025 मेरेन देशांतल्या टीबी दुयेंतींचो आंकडो उणो करपा भारत सरकाराची राष्ट्रीय क्षय निर्मूलन कार्यावळ आसा. ह्या कार्यावळींत टीबी संसर्ग प्रतिबंध आनी नियंत्रण (IPC) हांचे उपाय आसपावीत आसात, जे टीबी आडावपाक गरजेचे आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
