भांगरभूंय | प्रतिनिधी
खासगी टॅक्सी भाड्याक दिवपाच्या प्रकारांचेर कारवाय
भांगरभूंय । प्रतिनिधी
पणजी : आपली वैयक्तीक खासगी टॅक्सी कांय धनी ती परतून दुसऱ्याक भाड्याक चलोवपाक दिता. ह्या टॅक्सींचेर कारवाय करपाची प्रक्रिया येरादारी पुलिसांनी सुरू केल्या. आतां मेरेन 53 टॅक्सीकारांक नोटिसो जारी करून परवानो रद्द करपाची प्रक्रिया सुरू जाल्या. येरादारी कायद्याच्या कलम 192 – ए खाला ही कारवाय सुरू जाल्या.
गोंयांत सध्या रस्तो सुरक्षा सप्तक चालू आसा. रस्तो सुरक्षा सप्तका खाला जागृताय कार्यावळीं सयत येरादारी नेम मोडप्यांक तालांव दिवप चालू आसा. तशेंच आपली खासगी टॅक्सी दुसऱ्याक भाड्याक दिवपी टॅक्सीकारांचेर कारवाय करपाची प्रक्रिया चल्ल्या. फाटल्या 4 दिसांत 53 जाणांचेर गुन्यांव नोंद जावन कारवायेची प्रक्रिया सुरू जाल्या. तांचे परवाने रद्द जातले. 14 ऑक्टोबराक 17 टॅक्सीवाल्यांचेर गुन्यांव नोंद जाल्ले. ते उपरांत 15 ऑक्टोबराक परतून 17 जाणांचेर गुन्यांव नोंद जाल्यात. हाचे उपरांत 17 जाणां आड गुन्यांव नोंद जावन नोटीसो दिल्यात. आतां मेरेन 53 जाणांक नोटिसो जारी केल्यात. परवानो रद्द करपाची प्रक्रिया सुरू जाल्या. ही मोहीम चालूच उरतली. हाका लागून खासगी टॅक्सी भाड्याक दिवप्यांचेर लेगीत कारवाय जातली. पणजी, म्हापशें, कळंगूट, पर्वरी, हणजूणें, पेडणें, मोपा, दिवचल, फोंडें, मडगांव, वास्को, कुडचडें, दाबोळी, कोलवा आनी काणकोणच्या येरादारी फांट्यान कारवाय केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
