भांगरभूंय | प्रतिनिधी
केंद्रा कडल्यान मेळटले 18 कोटी 78 लाख रुपया
भांगरभूंय | प्रतिनिधी
पणजीः मदले सुटयेंतल्या खाणाचेर अंदूं गोंयांत 38 कोटी 27 लाख रुपया खर्च जातले. केंद्रा कडल्यान 18 कोटी 78 लाखांचो निधी मेळटलो. उरिल्ली रक्कम गोंय सरकार घालतलें, अशें शिक्षण संचालक शैलेश झिंगडे हांणी सांगलें.
दर वर्सा परस अंदूं गोंय सरकार चड खर्च करतलें. मदले सुटयेंतल्या खाणा विशीं कांय गजालींचें स्पश्टीकरण करपा खातीर शिक्षण संचालक शैलेश झिंगडे हांणी शुक्रारा पत्रकार परिशद घेतली. ह्या वेळार तांणी ही म्हायती दिली.
केंद्रा कडल्यान आतां मेरेन गोंयाक दोन हप्ते मेळ्ळ्यात. 7 कोटी 44 लाखांचो पयलो हप्तो 13 जूनाक मेळ्ळो. हाचे उपरांत 7 कोटी 44 लाखांचो दुसरो हप्तो 25 जुलयाक मेळ्ळो. तिसऱ्या हप्त्या खातीरचो प्रस्ताव सादर केला. केंद्रा कडल्यान अंदूं 18 कोटी 78 लाख रुपयांचो निधी मेळटलो. अंदू गोंय सरकार 10 कोटी 91 लाख रुपया मदले सुटयेंतल्या खाणाचेर खर्च करतलें. ते भायर गरज भागोवपा खातीर आनीक 8 कोटी 48 लाख रुपया मदले सुटयेंतल्या खाणाचेर खर्च करपाचो निर्णय सरकारान घेतला. हाका लागून गोंय सरकार 19 कोटी 39 लाख रुपया मदले सुटयेंतल्या खाणाचेर खर्च करतलें, अशें शिक्षण संचालकांनी सांगलें.
गोंयच्या विद्यार्थ्यांक आवडनात तांतयां
गोंयकारांक मांसाहार आवडटा, असो समज आसा. दोन वर्सां पयली दोन विद्यालयांनी मदले सुटयेंतल्या खाणांत तांतयां दिवपाचो प्रयोग जाल्लो. हाका मात पसून प्रतिसाद मेळ्ळो ना. हाका लागून मदले सुटयेंतल्या खाणांत तांतयां दिवपाचो प्रस्ताव रद्द जाला. चिकी, नाचण्याचे लाडू मात विद्यार्थी खूब आवडीन खातात, अशें शिक्षण संचालक शैलेश झिंगडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
