भांगरभूंय | प्रतिनिधी
मातये भरवण केल्ल्या बांदकामां मदीं उपनगराध्यक्षाच्या बांदकामाचो आस्पाव
भांगरभूंय । प्रतिनिधी
म्हापशें: म्हापशेंच्या करासवाडो जंक्शना वयलीं वट्ट 35 बेकायदो दुकानां म्हापशें पालिकेन पुलिसांचें संरक्षण घेवन जेसीबीच्या आदारान मातये भरवण केलीं. रस्तो रुंदीकरण आनी जंक्शना वयले येरादारीक आडखळ करपी हीं बेकायदो दुकानां पालिकेन मोडलीं. तातूंत उपनगराध्यक्षाच्या बांदकामाचो आस्पाव आसा.
शुक्रारा 18 ऑक्टोबराक सकाळीं पालिकेन ही कारवाय हातांत घेतिल्ली. ह्या वेळार मुख्याधिकारी चंद्रकांत शेटकार, पालिका अभियंता प्रशांत नार्वेंकार, कनिश्ठ अभियंता, पालिका निरिक्षक, दंडाधिकारी मेघना नायक, राष्ट्रीय महामार्ग प्राधिकरणाचे अभियंता, वीज अभियंता आनी कर्मचारी हाजीर आशिल्ले. दोन जेसीबीच्या आदारान हीं अतिक्रमणां काडलीं.
मुख्याधिकारी चंद्रकांत शेटकार हांणी सांगलें, करासवाडो जंक्शनाचेर परतून परतून येरादारेची कोंयडी जाताली. भौशीक बांदकाम खातें आनी येरादारी पुलिसां कडल्यान पालिके कडेन खूबश्यो कागाळी येताल्यो. ते प्रमाण पालिकेच्या तंत्रीक विभागान पळोवणी केली. कारवाय केल्ल्या 35 दुकानां मदीं उपनगराध्यक्ष सुशांत हरमलकार हांच्या एका दुकानाचो आस्पाव आसा.
पालिकेन केल्ले पळोवणेंत रस्त्याचे कुशीक बेकायदो 52 बांदकामां आशिल्ल्याचें कळ्ळें. ते प्रमाण संबंदीत बिराडकारांक आनी बांदकाम केल्ल्यांक पालिकेन कारणां दाखयात नोटीस जारी केली. सुनावणे उपरांत 52 तली फक्त दोनूच बांदकामां कायदेशीर आशिल्ल्याचें स्पश्ट जाल्लें. जाल्यार हेर 50 बेकायदो बांदकामांक पालिकेन अतिक्रमण हटाव आदेश जारी केल्लो, अशें मुख्याधिकाऱ्यान सांगलें.
50 तल्या 14 जाणांनी पालिका संचालनालया कडेन आव्हान याचिका दाखल केली. तातूंतल्या कांय बांदकामांक स्थगिती मेळ्ळी. जाल्यार एकल्यान स्वता जावन आपलें बांदकाम काडलें. उरिल्लीं 35 बांदकामां आमी मोडलीं. मदल्या काळांत पालिकेन थंयचीं कांय बांदकामां मोडिल्लीं, मात म्हामार्ग रुंदीकरणा वेळार हीं बांदकामां परतून उबारिल्लीं, अशें मुख्याधिकाऱ्यान सांगलें.
जांणी कारवायेचेर स्थगिती मेळयल्या, तीं बांदकामां हो खटलो सोंपा मेरेन मोडचे नात. मात सुनावणी पुराय जाय मेरेन संबंदितांक कसलोच वेवसाय करपाक मेळचो न्हय, हे खातीर तीं दुकानां पालिका सील कररतली, अशें मुख्याधिकाऱ्यान स्पश्ट केलें. दुकानकार शंभू शेट्टर हांणी सांगलें, हीं दुकानां आमी स्वताचे जमनीर बांदिल्लीं. म्हापशें पालिकेन आमकां नोटिसो धाडिल्ल्यो, मात आमी त्या नोटिशींक आव्हान दिवचे आदींच पालिकेन ही कारवाय केली. दुकानांतलें सामान काडपाक लेगीत वेळ दिवंक ना. आमी थंय कसलोच गैरप्रकार करिनाशिल्ले. फळां, भाजयो आनी खाद्यपदार्थ विकपाचो वेवसाय करतले.
राजकी हस्तक्षेप नाः मुख्याधिकारी
ह्या बांदकामां फाटल्यान राजकी हस्तक्षेप ना, तरी लेगीत इतलीं वर्सां बिनधास्त तरेन हो बेकायदो वेवसाय चलतालो. नगरपालिका आनी हेर अधिकाऱ्यांनी ताचेर सामकीच आडनदर केल्ली. कारवाय करचे आदीं सुरवेक पालिकेन त्या दुकानकारांक दुकानांतलें सामान काडपाक फावोसो वेळ दिल्लो. ते प्रमाण कांय जाणांनी आपलें सामान आनी हेर वस्तू काडल्यो, जाल्यार कांय जाणांनी सामान काडूंक नाशिल्ल्यान त्या सामानांची मोडतोड जाली, अशें म्हापशें पालिका मुख्याधिकारी चंद्रकांत शेटकार हांणी सांगलें.
आमच्या दुकानांक 25 वर्सां जाल्यांत. म्हामार्ग रुंदीकरणांत दुकानां येतात, हे खातीर तीं काडटात. आमचीं वट्ट 5 दुकानां आशिल्लीं आनी वेपार परवानोय आशिल्लो. जांचीं दुकानां मोडल्यांत, तांच्या पोटापाण्याचो विचार करून सरकारान तांचे हेर कडेन पुनर्वसन करचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
