भांगरभूंय | प्रतिनिधी
पणजी ः पर्यावरण मंत्री आलेक्स सिक्वेरा हांचे अध्यक्षते खाला आयज पर्वरे मंत्रालयांत सेंट फ्रान्सीस झेवियर पवित्र अवशेश प्रदर्शना खातीरच्या सचिवालय समितीची बसका जाली. पोरणे गोंयां 21 नोव्हेंबर 2024 ते 5 जानेवारी 2025 मेरेन सेंट फ्रान्सीस झेवियर पवित्र अवशेश प्रदर्शन जातलें. बसकेंत प्रदर्शनां संबंदीत आयोजीत कार्यक्रमांचें नियोजन, वेवस्था आनी देखरेख अशा विशयांचेर चर्चा जाली.
बसकेक कुमारजुवेंचे आमदार राजेश फळदेसाय, मुखेल सचीव पुनित कुमार गोयल, प्रदर्शन समितीचे आयुक्त संदीप जॅकीस, अरूण कुमार मिश्रा, उत्तर गोंय जिल्होधिकारी डॉ. स्नेहा गीते, दक्षीण गोंय जिल्होधिकारी अश्विन चंद्रु, म्हायती आनी प्रसिद्धी संचालक दीपक बांदेकार, मजूर आनी रोजगार आयुक्त डॉ. लेविन्सन मार्टिन, प्रदर्शन समितीचे समन्वयक फा. हेनरी फाल्कांव आनी हेर सरकारी विभागांचे अधिकारी हाजीर आशिल्लें.
पवित्र अवशेश प्रदर्शन काळांत गोंयांत भेट दिवपी भाविकांक उत्कृश्ट सुविधा दिवपाक आवश्यक साधनसुविधा जशें येरादारी, निवास आनी हेर वेवस्थेचो नियाळ घेतलो. बसकेत सुशोभिकरण, रस्ते, टॉयलेट, विद्युतीकरण, सीसीटीव्ही कॅमेरा, सुरक्षा वेवस्था, पार्किंग, इलेक्ट्रिक बुगींस आनी हेर सुविधांचेरुय चर्चा जाली.
ह्या वेळार भाविकांचे सुविधे खातीर सुरू केल्ले वेबसायटीचें उक्तावण केलें. भाविक https://sfxexpo2024.goa.gov.in/ ह्या वेबसायटीचेर वचून म्हायती मेळोवंक शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
