भांगरभूंय | प्रतिनिधी
मालवण, खबरां संस्था: छत्रपती शिवाजी महाराजांचो पुतळो कोसळ्ळे उपरांत हे घडणुकेची पुराय देशांत बरीच चर्चा जाली. ह्या प्रकरणा उपरांत राज्य सरकाराचे वतीने गुन्यांवूय दाखल केल्लो. आतां ह्या प्रकरणांतल्या तिसर्या आरोपीक अटक केल्या. परमेश्वर यादव अशें ताचें नांव. यादवान ह्या पुतळ्याचें वॅल्डींग काम सारकें करूंक नाशिल्ल्याचो आरोप ताचेर आसा. उत्तर प्रदेशांतल्या मिर्जापुरच्यान यादव हाका अटक केली. आतां ताका न्यायालयांत हाजीर केल्ले कडेन ताका तीन दिसांची न्यायालयी बंदखण दिल्या.
मालवणच्या राजकोट किल्ल्याचेर आठ म्हयन्यां आदीं छत्रपती शिवाजी महाराजांचो २८ फूट उंच पुतळो बसयल्लो. प्रधानमंत्री नरेंद्र मोदी हांचे हस्तुकीं ह्या पुतळ्याचें लोकार्पणूय जाल्लें. मात, २६ ऑगस्टाक हो पुतळो कोसळ्ळो. ताका लागून पुराय देशभर हाचेर टिका जाली. छत्रपतीं शिवाजी महाराजांचो पुतळो कोसळिल्ल्याच्या कारणा वेल्यान विरोधी पक्षांनी राज्य सरकाराक धारेर धरिल्लें. ताका लागून हाची खोलायेन तपासणी करून गुन्यांव दाखल करपाचे आदेश राज्य सरकारान दिल्ले.
ह्या प्रकरणांत चवकशेक नेट आयल्या उपरांत, तांत्रीक दोशाक लागून आनी सकयल्या दर्जाचें काम केल्ले खातीर ही घडणूक घडिल्ल्याचें कारण मुखार आयलें. ह्या प्रकरणांत पुतळ्याचो शिल्पकार जयदीप आपटे हाकाय पुलिसांनी अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
