भांगरभूंय | प्रतिनिधी
नवी दिल्ली, खबरां संस्था ः डेंग्यू दुयेंसाक लागून जायते जाणांक मरण येता. डेंग्यूंत रगतांतलीं प्लेटलेट उणीं जाल्ल्यान दुयेंतीक मरण येवपाचो धोको चड आसता. प्लेटलेट वाडोवपा खातीर जायते घरगुती उपाय करपाची वेळ येता. आतां इंडियन काउन्सिल ऑफ मेडिकल रिसर्च सेंटरान डेंग्यू संबंदी एक खबर दिल्या. भारतान डेंग्यूचें वासीन तयार केलां आनी ताची निमाणी चांचणी सुरू आसा.
इंडियन काउन्सिल ऑफ मेडिकल रिसर्च संचालक डॉ. राजीव बहल हांणी हे संबंदी म्हायती दिल्या. भारतान डेंग्यूचे वासीन तयार केलां अशें तांणी सांगलें. हें तंत्रज्ञान अमेरिकेच्या एनआयएच कंपनीन तयार केलां. पूण ते वासीनतयार करपा मेरेन पावले नात. पूण आतां भारताक हें वासीन पुरायपणान तयार करपाक येस मेळ्ळां.
डेंग्यू खातीर तयार केल्लें वासीन आयसीएमआरान मान्य केल्या. ड्रग कंट्रोल जनरलान निमाण्या फेस-3 चांचणेक मान्यताय दिल्या. चांचणे उपरांत रिपोर्ट पॉझिटिव्ह आयल्यार तें वापरूं येता.
आनीक एका वासिनाचें काम सुरू…
आनीक एक वासीन तयार करपाचें काम सुरू आसा, जें ज्युनोटिक दुयेंसा खातीर तयार करतले. आयसीएमआरच्या सहकार्यान हीं दोनूय वासीनां तयार करतात. ह्या वासिनाची ल्हान जनावरांचेर केल्ली चांचणी येसस्वी जाल्या. उपरांत व्हडल्या जनावरांचेर आनी मनशाचेर ताची चांचणी जातली. पयले चांचणेकूय मान्यताय मेळ्ळ्या अशें इंडियन काउन्सिल ऑफ मेडिकल रिसर्च संचालक डॉ. राजीव बहल हांणी सांगलें. एमपॉक्स दुयेंसाचे (मंकी पॉक्स) चांचणी किड तयार करपाकय भारताक येस मेळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
