भांगरभूंय | प्रतिनिधी
भारतांत संस्कृतायेक चड म्हत्व दितात. इतलेंच न्हय तर भारतीय संस्कृतायेंत लग्न म्हळ्यार एक बरें नाते मानतात. घोव- बायल एकामेकांक लग्नांत सात जल्म एकठांय रावपाचें उतर दितात. पूण, आतां भारतांतय घटस्फोटांचो आंकडो व्हड प्रमाणांत वाडला. फाटल्या कांय वर्सांत तर भारतांत घटस्फोटाचो आंकडो बरोच वाडला.
भारतांत घटस्फोटाचीं 5 मुखेल कारणां
व्यस्त जिणेपद्दत: आयचे व्यस्त जिणेंत घोव- बायल हांचे मदीं संवादाचो फरक (Communication gap) वाडत आसा. घोव- बायल दोगांय ऑफिसांत वचपी आसल्यार आपलो वेळ आनी वेवसायीक जिवीत एकठांय सांबाळप कठीण जाता. जें भावनीक अंतर निर्माण करता. तशेंच जायते गैरसमज निर्माण जातात. ताका लागून घटस्फोट जावंक शकता.
समाजीक विचारांत बदल – सुरवेक घटस्फोट हो स्वताचेर लागिल्लो व्हडलो दाग अशें मानताले. कारण आदल्या काळांत घटस्फोट घेवपाचो विचार करतना जायत्या गजालींक तोंड दिवचें पडटालें. पूण आतां परिस्थिती पुरायपणान बदलल्या. आतां लोक परिस्थिती बेगीनांत बेगीन मान्य करपाक शिकल्यात. खास करून शारांनी घटस्फोट घेवप चड प्रमाणांत जावपाक लागलां.
बायलां जागृताय – फाटल्या कांय वर्सांत बायलां मदीं साक्षरतायेचें प्रमाण नेटान वाडत आसा. तशेंच बायलांक अर्थीक नदरेन स्वतंत्र आनी सशक्त जावपाची संद मेळपाक लागल्या. बायलांक आतां स्वताचे निर्णय स्वता घेवपात लागल्यात. देखून लग्ना उपरांत आपल्याक जाय तशें जगूंक, वागपाक मेळना जाल्यार बायलां घटस्फोट घेवपाचो निर्णय स्वता घेता.
अहंकार समस्या (Ego Problem) – आयचे घोव-बायल स्वतंत्र आसतात, देखून तांचे मदीं अहंकार समस्या खूब निर्माण जातात. एकलो राग आनी दुसरो शांत आसल्यार नातें चड काळ तिगूंक शकतात. पूण अहंकार सतत नात्यांत येत जाल्यार नाते घटस्फोट घेवपा मेरेन पावूं येता.
लव्ह मॅरिजाचे वाडटें प्रमाण – पयलीं घरांतलो मुखेल मनीस लग्न थारायतालो. देखून घोव- बायले मदीं कसलोय मतभेद जाल्यार हो वाद सुटावो करप हीय घरांतल्या जाण्ट्यांची जापसालदारकी आशिल्ली. पूण आतां लव्ह मॅरिजाचे प्रमाण वाडलां. तरणाटे आतां लव्ह मॅरिजाक चड प्राधान्य दितात. पूण लग्न जाले उपरांत तांचीं सपनां पुराय जायनात जाल्यार घटस्फोट घेवपाचें ते स्वताच थारायतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
