भांगरभूंय | प्रतिनिधी
गोंयचे भौशीक येरादारी वेवस्थेंतलीं व्हड उणेपणां येरादारीच्या सप्तकांत मुखार आयल्यांत. सप्तका भितर येरादारी सचिव, अधिकाऱ्यांनी केंद्रीय यंत्रणेन दिल्ले म्हायतीचो आनीक अभ्यास करचो. तातूंतली बारीकसाण घेतल्यार आशिल्ली वेवस्था सुदारप शक्य आसा. सगल्या ड्रायव्हरांचे दोळे तपासपाचीं शिबीरां बसधनी संघटनेच्या आदारान घेवचीं. जे यंत्रणेन भौशीक येरादारी वेवस्थेचो नियाळ, सर्वेक्षण केलां तेच यंत्रणेक अपघातांचो अभ्यास करुंक लावचो. येरादारी सप्तकांत पुलिसांचे बाराबरीन येरादारी अधिकारी, कामगारांक रस्त्यार देवचें पडटलें. येरादारीचेर लोकांक, ड्रायव्हर, क्लिनरांक, बसधनयांक जागें करप व्हड वावर आसा. सदांच रस्ते बरे ना म्हणून सरकाराचेर बडी मारतना नागरिकांनी आपल्या काळजाचेर हात दवरुन आपणे लागणुकेक पाळो दिला, आपूण खंय चुकलां, ह्या प्रस्नांची जाप सोदची.
येरादारी सप्तक, पंद्रस, म्हयनो अदीं मदीं चालूच दवल्ल्यार वर्सा भितर अपघातांचे प्रमाण उणें जाल्लें दिसतलें. सप्तकाच्या खंयच्या दिसांनी, वगतार येरादारी वाडटा ताचेर नदर दवरची पडटली. हो वावर नागरिकांनीय करुंक येता. येरादारी सप्तकां केलीं, सप्तकांत नागरिकांक जाग हाडली, वर्सभर येरादारींत सुदारप जालेंच ना, अपघात वाडत रावले जाल्यार सरकारी यंत्रणाच न्ही, जागोवपी समाजय नापास जाला अशें म्हणचें पडटलें. मोख दवरुन अपघातांचें प्रमाण कमी करपाचो वावर करचोच पडटलो.
येरादारीच्या प्रस्नाचेर दिसपटे वावरांतल्यान, अचूक अभ्यासांतल्यान अपघात कित्याक जातात ताचीं कारणां कळटलीं, फुडारांत सुदारपाक दिका दिसतली. गाडयो, स्कुटरी, बस चलयतल्यांक नियंत्रण दवरपाक कळटा? येरादारीचे नेमावळीची कितली जाणवीकाय आसा? तें कळपा पासत कार्यावळी वर्सभर जावच्यो. अल्कोमिटरांचो उपेग सदांच जाय, मुखेल करुन पर्यटक चोम्यांनी एकठांय येतात, येरादारीचीं साधनां हाडटात, घेतात, दवरतात ते सुवातींनी. पार्किंग सुविधांचो उणाव राज्यांत आसा, खासगी बशी पोरण्यो जाल्यात, चडपा देंवपाची वेवस्था सारकी ना हें बारीकसाण घेतल्यार दिश्टी पडटा. दर्यादेगांनी पर्यटक वाडटात त्या दिसांनी तात्पुरत्यो पार्किंग सुविधा जातात, त्याच सुविधांचो सदांच उपेग करपा पासत वेवस्था जाय.
पुलिस येरादारी विभाग, येरादारी खातें, बांदकाम खातें, नागरिकांच्या पंगडांचे बांदावळींतल्यान अभ्यास, उपायांतल्यान अपघात कित्याक कमी जावचे न्हय? ट्रॅफिक सिग्नलांतल्यान येरादारींत शिस्त येता, ए. आय. च्या आधारान येरादारीचेर दोळो दवरपी कॅमेरे गुन्यांवकारांक सोदतात हें सत. गरज थंय सिग्नल, कॅमेरे केंद्र सरकाराचे निधींतल्यान उबारप, ते पुलीस येरादारी फांटो, येरादारी खात्याक जोडपाचेर अभ्यास जावचो.
आप वावुरपी संस्था, संघटना अळम्यावरी केन्नाय वावर करतात, एकादरो रोलंड मार्टिन्सावरी वावुरपी वर्साचीं वर्सां वावरांत घुस्पता. कितें आशिल्लो हो रोलंड? जागृत गोंयकारांची फौज ही संघटना रोलंडान तीन साडेतीन दसकां फाटीं बांदिल्ली. संघटनेचो मुखेल वावर पर्यटना आड आशिल्लो. गोल्फ कोर्स, विदेसी भोंवडेकार कित्याक जाय? अशे प्रस्न विचारत भोंवडेकारांचेर शेण मारपी रोलंड कालचो. आयज सरकारी वेवस्था सुदारपा पासत आप वावुरपी जाल्लो रोलंड समाजीक प्रस्नांचेर गिरायकांक जागयता, सरकाराचो मार्गदर्शक जाला.
कुकिंग गॅस, कोयर वेवस्थापनाचेर, येरादारी शिस्तीचेर लोकांक जागें करपी रोलंड बिजलेच्यो दरो वाडोवपा पासत जावपी अदालतींनी झगडटा. तातूंतल्यान ताका कितें मेळटा? पोट भरपा पासत तो कितें करता? सरकारानय ताचो उपेग करुन घेतला. चार पयशे सरकारी येवजणी, सरकारा पासत आप वावुरपी जावन ताणें केल्यात? ह्या प्रस्नाच्यो जापो सरकारान सोदून काडल्यार रोलंड भाटकार? रीणकार? ही म्हायती मेळटली. पुरुमेंताच्या फेस्तांतल्यान रोलंडान कोयर वेवस्थापनाचेर, प्लास्टिक कोयराचेर जागयलां. जात्रा, फेस्तांतल्यान तो वावर इगर्ज, देऊळ, मशीद समित्यो करुंक शकतात. कोयर वेवस्थापन, जात्रा, फेस्तां वेळार जावपी येरादारीची कोयंडी हो वेगळो विशय आसलो तरी प्लास्टिकाच्या कोयराचो येरादारी कडेन, अपघातां कडेन संबंद आसा.
प्लास्टिकाच्यो बाटल्यो उदक, थंड पेयां पियेवन रस्त्यार उडोवप गुन्यांव जावचो. बाटल्यो, टेट्रा पॅक रस्त्यार उडयल्यार अपघात जातात? रोलंडा कडेन जाप आसतली. वर्सांची वर्सां समाजीक प्रस्न सोडोवपाक वावुरिल्ल्यान ताचे लागीं आनी ताचे आप वावुरपी संस्थे कडेन नियाळ आसतले. रोलंडावरी आप वावुरपी गोंयांत आसचे नात अशें न्हय. तांचो वावर लिपचोरयां जाता आसत जाल्यार रोलंड उगतेपणान वावुरता, झगडटा. नायट क्लबा सारक्या अरिश्टांतल्यान अपघात कित्याक जावचे ना? नायट क्लब कितल्या वरांचेर उगते जातात, बंद जातात हें सोदल्यार कायदे वाऱ्यार उडोवपी मेळटले. तांकां खर ख्यास्त जाता? नायट क्लब चलोवपाक लायसन्स दिलां की सोरो विकपी रेस्टाॅरंटां तीं चलयतात? जांणी नायट क्लबांक जल्म दिलो तांकां तीं आतां जड जाल्यांत? नायट क्लबांचे पसरे जाल्यात, विदेसी नागरिकांक तीं भाड्यान दिल्यांत जाल्यार तांचेआड कारवाय जावचीच. शिस्तीन केल्ले कारवायेंतल्यान व्हडा प्रमाणात येणावळ सरकाराचे तिजोरेक मेळटली. दिसपट्टे कारवाय चालू उल्ल्यार अपघात उणे जाल्ले दिसतले. मुख्यमंत्री डाॅ. प्रमोद सावंत अल्कोमिटरांचो चडांत चड उपेग करपाची शिटकावणी दितात. दिसा उजवाडे सोरो पियेवपी तातूंतल्यान मेळटले. ते हजारांनी मेळटात जाल्यार राष्ट्रीय म्हामार्ग, शाळा, देवळां लागसल्ल्या वाठारांतली तावेर्ना, सोरो विकपी हाॅटेलां बंद करचीं. एक पिळगी वेसनातल्यान वाटायिल्ल्याची धादोसकाय सरकाराक ते कारवायेंतल्यान मेळटली. गोंयच्यो दर्यादेगो सोरेकारांक न्हय, बियर, सोऱ्याच्यो बाटल्यो हाडपाक दर्यादेगेर, दर्यावेळेर बंदी आसा ही शिटकावणी सरकारान दिवची. ते विशींचे तकटे दर्यादेगेच्या वाठारांत बिजलेच्या खांब्यार लावचे, राबित्याच्या सुवातींनी जागृताय जावची.
सोरो, तंबाखू, तंबाखूचें पान, घुंवळे वखदां घेवप, न्हीद सारकी ना मेळप, वक्ल ना लावप, सुळसुळीत रस्त्यांचेर गाड्यो, स्कुटरी येरादारीच्या नेमावळीक पाळो दिनासतना धांवडावप ही अपघाताचीं कांय कारणां. ते भायर रस्त्यावयलीं फोंडकुलां रोखडीं ना भरप, रस्त्यार तकटे नासप, लागींच वचपाक गाडी, स्कुटरीचो, मोटारसायकलींचो उपेग करप हें
अपघातांक आपोवणें.
पूल आनी रस्ते वाडिल्ल्यान हेर राज्यांतल्यान सामान हाडपी गाडयो, ट्रक अती जाल्यात. तांकांय वेळाची मर्याद घालची, शिकोवची पडटली. व्हडल्यो गाड्यो गोंयांत वाडल्यात, एका घराब्यांत चार- पांच गाड्यो आसात. तांकां एकच गाडी दिसाची उपेगाक हाडपाची सुचोवणी करुन मोटारींची गर्दी कमी करुंक शकता.
राज्यांत लोकसंख्या वाडल्या, खोपींतय गाड्यो, मोटारसायकली पावल्यात. मात रस्ते रुंद करपाक आडमेळीं. हेल्मेट कम्पलसरी करप, हेल्मेट घालिनाशिल्ल्यांक सदांच आडावप, तालांव दिवप हें अखंडितपणान चालू दवरचें, आपसूक सुदारप जातलें. वर्सभराच्या वावराची मोख दवरुन अॅक्सीडेंट कमी करपाक आमीय वांटो घेवया.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
