भांगरभूंय | प्रतिनिधी
व्हाळांतल्या उदकाची पातळी वाडिल्ल्यान विद्यार्थी गेल्लो व्हांवून
भांगरभूंय । प्रतिनिधी
फोंडें: उसगांव पंचायत वाठारांतल्या साईनगरांत बुधवारा सांजे वेळार घोग्यांनी पडपी पावसाक लागून व्हाळांतल्या उदकाची पातळी अचकीत वाडिल्ली. तातूंत 11 वर्सां पिरायेचो दर्शन संतोष नार्वेंकार ह्या व्हांवून गेल्ल्या विद्यार्थ्याची कूड बिरेस्तारा दनपारां सापडली.
बुधवारा रातींच्यान फोंडें पुलीस आनी उजो पालोवपी दळाचे कर्मचारी घडणुकेचे सुवातेर व्हांवून गेल्ल्या विद्यार्थ्याचो सोद घेताले. बिरेस्तारा दनपारां एमआरएफ कंपनी लागसार आशिल्ले दुदसागर न्हंये वागसार दर्शनाची कूड सांपडली. ट्युशन सोंपले उपरांत शॉर्ट कट मार्गान घरा वचपाच्या यत्नांत दुर्घटणा घडिल्ली.
बुधवारा ट्युशन सोंपले उपरांत यत्ता 5 वी यत्तेंत शिकपी दर्शन हो आपले भयणी सयत हेर इश्टां वांगडा घरा वतालो. त्या वेळार घोग्यांनी पडपी पावसांत विद्यार्थ्यांनी व्हाळांतल्यान वचपाचो यत्न केलो. त्या वेळार दर्शन व्हाळांत पडलो. लागींच आशिल्ले भयणीन आनी हेर विद्यार्थ्यांनी ताका उदकांतल्यान भायर काडपाचो यत्न केलो. पूण उदकाची पातळी वाडिल्ल्यान उदकाच्या झोतांत दर्शन व्हांवून गेलो.
हे घडणुकेची म्हायती तत्काळ फोंडें उजो पालोवपी दळाच्या कर्मचाऱ्यांत तशेंच पुलिसांक दिली. पुलीस निरिक्षक विजयनाथ कवळेंकार आनी उजो पालोवपी दळाचे अधिकारी सुशील मोरजकार हांच्या फुडारपणा खाला बेपत्ता जाल्ल्या विद्यार्थ्याचो सोद घेवपाक सुरवात केली.
बुधवारा रातच्या 2 वरां मेरेन सोद घेतलो. ते उपरांत बिरेस्तारा सकाळच्यान बेपत्ता विद्यार्थ्याचो परतून सोद घेवपाक सुरवात केली. दनपारां 12.30 वरांच्या सुमाराक एमआरएफ कंपनी लागसार दुदसागर न्हंये लागसार बेपत्ता विद्यार्थ्याची कूड उजो पालोवपी दळाच्या कर्मचाऱ्यांक दिसली. फोंडें पुलिसांनी घडणुकेचो पंचनामो करून कूड पोस्टमार्टमा खातीर मडगांवच्या हॉस्पिटलांत व्हेली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
