भांगरभूंय | प्रतिनिधी
म्हापशें, प्रतिनिधी ः म्हापशेंच्या बाजारांत कोयराचें वर्गीकरण करतना एका भाजी विकपी मनशान कोयर उडोवन नगरपालिका कर्मचार्यांक मारपेट करपाचो यत्न केलो. ह्या प्रकरणांत पालिका कर्मचार्यांनी भाजी विकपी दुबावीत सादीक हुलगेरी हाचे आड म्हापशें पुलीस स्टेशनांत कागाळ केल्या. सगळे नगरपालिका कर्मचारी पुलीस स्टेशनाचेर जमले म्हणून शारांतलें कोयर एकठांय करपाचें काम कांय काळ थांबलें.
ही घडणूक बिरेस्तारा सकाळीं सुमार साडेणव वरांचेर घडली. म्हापशेंच्या भाजी बाजारा लागसार पालिका कर्मचारी कोयराचें वर्गीकरण करताले. ह्या वेळार दुबावीत भाजी विकपी सादीक हुलगेरी हो थंय आयलो आनी तांणी थंय हाडून कोयर उडयलो. हो कोय कागाळदार धुडाप्पा नेसरकर आनी विश्वनाथ बिरवाडकार ह्या पालिका कामगारांच्या हातांचेर पडलो. ताका लागून तांणी दुबाविताक जाप विचारली आनी मिस्तुराद केल्लो कोयर वेगळो करपाक सांगलें. तेन्ना दुबावितान तांचे वांगडा वाद घातलो. तशेंच कागाळदार धुडाप्पा नेसरकर हांचेर भाजयेचे ट्रेन आनी विश्वनाथ बिरवाडकर हाचेर खर्यान हल्लो केलो.
हो हल्लो हेर कामगारांनी आडायलो. उपरांत दुबावितान महेश पिरणकार, शेखर दुपदाळे, विश्वास पवार, नामदेव कांबळी ह्या कर्मचार्यांक गाळयो संवल्यो. उपरांत पालिका कामगारांनी पालिका अधिकार्यांच्या सल्ल्या प्रमाण पुलीस स्टेशनांत वचून दुबाविता आड कागाळ केली. पळून गेल्लो दुबावीत सांज मेरेन पुलिसांक मेळूंक नाशिल्लो.
मजगतीं, हे घडणुके उपरांत पालिका नितळसाण कामगारांनी कोयर संकलनाचें काम बंद दवरलें आनी सगळे पुलीस स्टेशनांत जमा जाले. पुलिशेंत कागाळ केले उपरांत कांय कामगारांचे मजतीन तांणी काम परत सुरू केलें. तशेंच पालिका अधिकार्यांनी ह्या प्रकरणाची दखल घेतले उपरांत दनपार मेरेन कोयर संकलनाचें काम पयले वरीं सुरू जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
