१००० जाणांक मेळटलीं मुफत हॅल्मेटां : मॉवीन

भांगरभूंय | प्रतिनिधी

वास्को, प्रतिनिधी: स्वताचे सुरक्षितताये खातीर जागरूक आशिल्ले, तशेंच अर्थीक नदरेन उणे आशिल्ल्यान हॅल्मेट विकत घेवपाक शकनाशिल्ल्या सुमार एक हजार दुचाकी चालकांक येरादारी खात्या वतीन हॅल्मेट फुकट दितले, अशें येरादारी मंत्री मॉवीन गुदिन्हो हांणी सांगलें.
येवपी काळांत म्हत्वाच्या सुवातांचेर सिसीटीव्ही कॅमेरे बसयतले. जाका लागून येरादारींत शिस्त येतली आनी गुन्यांव करून पळप्यांचो सोद घेवप सोंपें घातलें, अशेंय मंत्री गुदिन्हो हांणी स्पश्ट केलें.
येरादारी सुरक्षा सप्तका निमतान चिखली चौकांत आयोजीत जागरुतीचे कार्यावळींत मंत्री गुदिन्हो उलयताले. ह्या वेळार तांणी २५ दुचाकी चालकांक मुफत हॅल्मेटां दिलीं. ह्या वेळार तांचे वांगडा मुरगांवचे नगराध्यक्ष गिरिष बोरकार, उपनगराध्यक्ष रामचंद्र कामत, नगरसेवक प्रजय मयेंकार, दामू कासकार, यतीन कामुर्लेकार, विनोद किनळेंकार, जिल्लो पंचायत वांगडी अनिता थोरात, येरादारी पुलीस निरीक्षक शैलेश नार्वेंकार आनी हेर आशिल्ले.
दाबोळी मतदार संघांतल्या हेर चौकांनी आनीक २५ हॅल्मेटां दितले. हॅल्मेटा बगर दुचाकी चलोवपी कांय जाणां कडेन हांव उलयलों. तेन्ना तांणी हॅल्मेट घेवपाची आमकां अर्थीक तांक ना अशें सांगलें. जाल्यार कांय जाणांनी हॅल्मेट पेड्ड्यार जाल्ल्याचें सांगलें. ताका लागून तांकां हॅल्मेटां फुकट दिलीं. रस्तो अपघातांत जायत्या जाणांक मरण येता. अपघात जावचे न्हय, सगळ्यांनी सुरक्षीत उरचे हे खातीर जतनाय घेवपाची गरज आसा. रस्तो सुरक्षा ही फकत एका सप्तका खातीर न्हय, जाल्यार दरेका दिसा आसपाक जाय. दरेकल्यान येरादारी सुरक्षीतताये विशीं जागरुकताय दाखोवपाची गरज आसा, अशें तांणी म्हणलें.
सध्या सीसीटिव्ही कॅमेर्‍यांची सामकी गरज आसा. ताका लागून येवपी काळांत आधुनीक सीसीटिव्ही कॅमेरे सगळे कडेन बसयतले. ह्या कॅमेर्‍यांक लागून वाहनचालकां मदीं शिस्त येतली. तशें गुन्यांवूय उणे जातले. कॅमेर्‍यांत येवपी गजालींक लागून गुन्यांवकारांचो सोद घेवपूय सोपें जातलें, अशें तांणी म्हणलें.
मंत्री गुदिन्हो हांणी केल्ल्या यत्नांक लागून मुरगांव पालिका मंडळाक उदरगतीच्या कामां खातीर ३ कोटी ७५ लाख रुपया पालिका संचालनालया कडल्यान मेळ्ळे. हे विशीं हाजीर आशिल्ले नगराध्यक्ष, उपनगराध्यक्ष, नगरसेवक हांणी गुदिन्हो हांचे उपकार मानले.