भांगरभूंय | प्रतिनिधी
उसगांव: फाटल्या दोन दिसां सावन परतीच्या पावसाक बरोच नेट आयला. ताका लागून व्हाळ, न्हंयांतले उदक वाडलां. ह्या घोग्यांनी पडपी पावसाक लागून साईनगर, तिस्क-उसगांवच्या व्हाळाक आयिल्ल्या हुंवारांत काल दर्शन संतोष नार्वेंकार (११) हो भुरगो व्हांवून गेल्लो. ताची कूड आयज एमआरएफ कंपनी लागसार सांपडली.चड म्हायती प्रमाण, दर्शन पांचवे यत्तेंत शिकतालो. काल सांजेवेळार जेन्ना तो आनी ताची भयण आनीक कांय विद्यार्थ्यां वांगडा ट्युशनांतल्यान घरा परततालीं. तेन्ना व्हाळाक आयिल्ल्या हुंवाराचें उदक रस्त्यार आयिल्लें. सांजवेळ जाल्ल्यान तांकां उदकाचो अदमास येवंक ना. रस्त्यार आयिल्ल्या उदकांतल्यान चलतना त्या विद्यार्थ्यां मदलीं तीग जाणां उदकांत पडलीं आनी व्हाळा वटेन व्हांवपाक लागलीं. तांतूंतल्या दोगांक वांगडा आशिल्ल्या हेर विद्यार्थ्यांनी वाटायलीं. हेर विद्यार्थ्यां मदीं दर्शनाची भयणूय आशिल्ली. मात दर्शनाक ते वाटावपाक शकले नात. उदकाच्या नेटार तो व्हांवून गेलो.हे घडणुकेची म्हायती मेळटांच उजो पालोवपी दळाचे जवान थंय पावले आनी तांणी ताचो सोद घेतलो. काल रातभर ताचो सोद ते घेताले. साईनगर- उसगांवच्यान दर्शन व्हांवून गेल्लो. ताची कूड आयज एमआरएफ कंपनी लागसार सांपडली. हे विशीं पुलीस तपासणी करता. दर्शनाच्या मरणाक लागून पुराय उसगांवां दुख्खाचें ल्हार पातळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
