भांगरभूंय | प्रतिनिधी
नवी दिल्ली, खबरां संस्था: केंद्रीय मंत्रिमंडळान बुधवारा गंवा सयत स रब्बी पिकांच्या उण्यात उण्या किमतींत म्हळ्यार हमीभावांत क्विंटला फाटल्यान १३० ते ३०० रुपयांची वाड करपाचो निर्णय घेतलो. तशेंच केंद्र सरकारी, निवृत्त केंद्रीय कर्मचार्यांच्या म्हारगाय भत्त्यांतूय तीन टक्के वाड केल्या.
प्रधानमंत्री नरेंद्र मोदी हांचे अध्यक्षते खाला मंत्रिमंडळाच्या अर्थीक वेव्हारा विशीं मंगळारा बसका जाली. हातूंत रब्बी हंगामांतल्या गंव, चण्यांची दाळ, मसूर, सांसवां आनी बाजरी ह्या पिकांच्या उण्यात उण्या किमतींत वाड करपाचो निर्णय घेतलो. ह्या वेळार केंद्रीय म्हायती आनी तंत्रज्ञान मंत्री अश्विनी वैष्णव हांणी ह्या निर्णयांचो वेंचणुकां कडेन मात पसून संबंद ना अशें स्पश्ट केलें.
केंद्रीय कर्मचार्यांक वाडिल्लो म्हारगाय भत्तो
केंद्र सरकाराचे एक कोटी परस चड कर्मचारी आनी निवृत्तिवेतनधारक हांच्या म्हारगाय भत्त्यांत तीन टक्के वाड केली. १ जुलय २०२४ सावन पूर्वलक्ष्यी प्रभावान ही वाड लागू केल्या. फाटल्या १२ म्हयन्यांच्या म्हारगाय निर्देशांकाच्या सरासरीच्या आधार म्हारगाय भत्त्यांत वाडीचो निर्णय घेतलो. अंदूं १ जानेवारीक म्हारगाय भत्त्यांत चार टक्के वाड करून तो ५० टक्क्यांचेर व्हेल्लो. आतां हातूंत तीन टक्क्यांनी वाड जाल्या. म्हारगाय भक्तो हो मूळ वेतन वा निवृत्तिवेतनाच्या प्रमाणांत दिता. ह्या निर्णयाचो फायदो ४९.१८ लाख केंद्रीय कर्मचारी आनी ६४.८९ लाख निवृत्तिवेतनधारकांक जातलो. ताका लागून केंद्र सरकाराचे तिजोरेचेर ९४४८.३५ कोटींचें वजें पडटलें.
हमीभावांत कितली वाड (रुपया प्रती क्विंटल) – पीक वाड हमीभाव
गंव : १५० – २४२५
सांसवां : ३०० – ५९५०
कारळी: १४० -५९४०
मसूर : २७५-६७००
चण्या दाळ : २१०-५६५०
बार्ली : १३०-१९८०
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
