भांगरभूंय | प्रतिनिधी
पेडणें, प्रतिनिधी: गोंयांत सगळे कडेन रेंव उसपुपाक खर बंदी आसा. अशें आसून लेगीत आगरवाड्यावेल्या सी स्कॅप वॉटर फ्रंट च्या लागसारा शापोरा न्हंयेंत रातच्या काळखाचो फायदो घेवन व्हडा प्रमाणांत रेंव उसपप चल्लां. अश्या बेकायदेशीर रेंव उसपप्यांचेर खर कारवाय करपाची मागणी जाता.
बुधवार, १६ ऑक्टोबर दिसा रातच्या सुमार ८.३० वरांचेर शापोरा न्हंयेंत रेंव उसपप चालू आशिल्ल्याचें स्वता पळयल्ल्या कांय लोकांनी ह्या प्रतिनिधी कडेन उलयतना सांगलें.
सरकारान गोंयांत रेंव उसपुपाचेर जरी बंद घाल्या तरी पेडणेंच्या जायत्या वाठारांनी रेंव उसपप चालूच आसा. अजाप करपा सारकी गजाल म्हळ्यार, रेंव उसपुपाचेर नदर दवरपा खातीर सरकारान दर्यादेग पुलीस स्टेशनांची निर्मिती केल्या. शापोरा न्हंयेंत गस्त घालपाक शिवोले दर्यादेग पुलीस स्टेशन निर्माण केलां. हांगा स्वतंत्र पुलीस निरीक्षक तशेंच पुलीस कर्मचारीय नियुक्त केल्यात. तांच्या वेतनाचेर सरकारी तिजोरेंतल्यान पयशे खर्च जाताच. वांगडा न्हंयेंत गस्त घालपा खातीर लाखांनी रुपया खर्च करून बोटींची वेवस्थाय केल्या. अशें आसून लेगीत बोटी मोडिल्ल्याचें कारण दिवन पुलीस रेंव उसपप्यांचेर कारवाय करपा कडेन आडनदर करतात. पुलिसांक हें सगळें खबर आसून लेगीत हे सगळे प्रकार सुरळीत चल्ल्यात, अशें थळाव्या नागरिकांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
