भांगरभूंय | प्रतिनिधी
ही येवजण चालूच उरतली; मात नव्यो बशी मेळच्यो नात
पणजी, प्रतिनिधी : बालरथ येवजणे खाला नव्यो बशी जरी मेळ्ळ्यो नात, तरी आसा त्यो बशी चालूच उरतल्यो. बशींचो सांबाळ करपाक ह्यान फुडें वर्साक ४ लाख २५ हजार रूपया मेळटले. आतां मेरेन त्यो सांबाळपाक ३ लाख ७५ हजार रूपया मेळटाले, अशें मुख्यमंत्री डॉ. प्रमोद सावंत हांणी सांगलें.
मंत्रीमंडळ बसके उपरांत पत्रकार परिशदेंत उलयतना तांणी ही म्हायती दिली. विद्यालयांच्या वेवस्थापनांनी योग्य रितीन बशी सांबाळपाक जाय. भुरग्यांचे सुरक्षितताये खातीर फिटनेस प्रमाणपत्र घेवपाक जाय. पोरण्यो जाल्ल्यो बशी बदलून दिवपाची लेगीत तयारी आसा. जीं वेवस्थापनां विनियोग प्रमाणपत्रां वेळार सादर करतलीं, तांकां हे पयशे पयलीं (ऍडवान्स) मेळटले, अशें डॉ. सावंत हांणी सांगलें.
बालरथ येवजण बंद करची न्हय, अशी मागणी शिक्षण संस्थांच्या वेवस्थापनांनी केल्ली. हाचे उपरांत मुख्यमंत्र्यांनी हें स्पश्टीकरण दिलां. बालरथ येवजणेक लागून सरकारी शाळा बंद पडटात काय? हाचेर सरकारान अहवाल मागला, अशी जाप मुख्यमंत्र्यांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
