रॅपर ‘बाब अवी ब्रागांझा’ आड हिंदूंच्यो भावना दुखाविल्ल्या प्रकरणांत गुन्यांव
भांगरभूंय | प्रतिनिधी
पणजी : पयलींच राज्यांत सुभाष वेलिंगकार हांच्या ‘त्या’ विधानाक लागून बरोच बोवाळ जाला. आतां मस्कत-ओमान रावपी मूळ माजोड्डेंचो रॅपर ‘बाब अवी ब्रागांझा’ हाचे आड गोंय पुलिसांनी हिंदूच्यो भावना दुखावल्ल्या प्रकरणांत गुन्यांव नोंद केला.
कोण हो अवी?
श्रीलंकन पॉप गायीका योहानी हिच्या गाजिल्ल्या ‘मनीके मागे हीते’ ह्या गिताचेर ‘बाब अवी ब्रागांझा’ हाणें कोंकणी आनी हिंदी रॅप तयार केल्लें. हाका लागून ताची वळख निर्माण जाली. गोवन पॉप सर्कलांत ताचें नांव आदरान घेतात. मात आतां ब्रागांझा हाणें अश्लील भास वापरून तशेंच हिंसक भाशेचो वापर करून एक रॅप गीत तयार केलां. ह्या रॅपाक लागून सोशल मिडियाचेर बरोच बोवाळ चल्ला. हातूंत ब्रागांझा हाचेर सोशल मिडिया वरवीं चुकीची म्हायती पातळपा वांगडा प्रधानमंत्री मोदीं आड हिंसात्मक टिप्पणी केल्ल्याचो आरोप आसा. ब्रागांझान हिंदू संत, देवांचेरूय ह्या रॅपा वरवीं टिप्पणी केल्ली.
मजगतीं, गोंय पुलिसांनी सोशल मिडियाचेर व्हायरल जाल्ल्या ह्या व्हिडियोची गंभीर दखल घेतल्या. खुबश्या जाणांनी ते विशींपुलिशेंत कागाळ केल्या. अवि ब्रागांझा हो मूळ माजोड्डेंचो. तो विदेशांत रॅप तशेंच पॉपच्यो कार्यावळी करता. बऱ्याच लोकांनी सोशल मिडिया वरवीं पुलिसांक टॅग करून हाचेर कारवाय करपाची मागणी केल्ली. हाच्या सादारान पुलिसांनी ‘बाब अवी ब्रागांझा’ आड समाजांत वांकडेपण निर्माण करपाच्या प्रकरणांत संबंदीत कलमा खाला गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
