भांगरभूंय | प्रतिनिधी
म्हापशें ः फाटल्या सप्तकांत दर्यादेगेवेल्या वाठारांनी जाल्ल्या गुन्यांवकारी प्रकरणांत निश्काळजीपणां दाखयिल्ल्यान कळंगूटचे पुलीस निरीक्षक परेश नायक आनी उपनिरीक्षक किरण नायक हांची राखीव दळांत बदली केली. ‘पशुवैजकी अधिकाऱ्यांक मारपेट, बायलेचो विनयभंग आनी क्लब डावनटावनांत जाल्लो बोवाळ ह्या प्रकरणांत निश्काळजीपणां दाखयल्ल्यान वरिश्ठांनी हो आदेश दिला.
पर्वरीचे पुलीस निरिक्षक राहुल परब हांचे कडेन कळंगूट पुलीस स्टेशनाचो अतिरिक्त ताबो दिला. तशेंच ह्या प्रकरणांत आनीक एका अधिकाऱ्याचेर खर कारवाय जावपाची शक्यताय आसा अशें कळटा.
म्हजो कांयच संबंद ना – शॅक धनी, सोनिया
कांदोळे दर्यादेगेर बायल पशुवैजकी दोतोराक आनी तिच्या वांगड्याक मारपेट जाल्ल्या प्रकरणा कडेन म्हजो कांयच संबंद ना अशें शॅक धनी सोनिया हिणें सांगलें. हांव घडणूक सुवातेर नाशिल्लीं. आमच्या एका कर्मचाऱ्यान म्हाका हे विशीं म्हायती दिल्या उपरांत हांव शॅकात पावलीं. ते उपरांत आमी जखमींक उपचारा खातीर हॉस्पिटलांत व्हरपाक तयार जाले. पूण ते खातीर ते तयार नाशिल्ले, अशें सोनिया हिणें स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
