भांगरभूंय | प्रतिनिधी
मडगांव: सां जुझे दी आरियाल हांगासरल्या रोझी फर्नांडीस हांच्या घरांत सप्टेंबर ते 13 ऑक्टोबर ह्या काळांत अनवळख्यांनी घरांत प्रवेश करून 30 हजार रोख रकमे सयत मायक्रोव्हेव आनी गॅस सिलिंडराची चोरी केल्ली. ह्या प्रकरणांत मायणा कुडटरी पुलिसांनी दोगां दुबावितांक अटक केल्या आनी दोगांकूय न्यायालयान पुलीस कोठी दिल्या.
सां जुझे दी आरियाल हांगासरल्या रोझी फर्नांडीस हांच्या घरांत चोरी जाल्ल्याची कागाळ तांच्या सोयऱ्यांनी कोन्सासिओ वाझ (रा. केळशी) हांणी मायणा कुडटरी पुलिशेंत नोंद केल्ली. सप्टेंबरा सावन 13 ऑक्टोबर मेरेनच्या काळांत ही चोरी जाल्ली. चोरांनी बंद घराच्या प्रवेशदाराची खिळी मोडून घरांत प्रेवेश केल्लो. उपरांत घरांतल्या सामानाची सोदासोद करून 30 हजार रुपयांची रोख रक्कम, एक नवो मायक्रोव्हेव, गॅस सिलिंडर असो सुमार 50 हजारांचो मुद्देमाल चोरिल्लो.
मायणा कुडटरी पुलिसांनी ह्या प्रकरणांत तपास करून दुबावीत चंद्रू उर्फ चांद पाटील (रा. पारोडा, केपें. मूळ हावेरी कर्नाटक) आनी दुबावीत गिरेश उर्फ गिर्या प्रभूनाटी (रा. आयडीसी नेसाय, मूळ बेळगांव कर्नाटक) हांकां ताब्यांत घेवन चवकशी केले उपरांत अटक केली.
ह्या प्रकरणांत मायणा कुडटरीचे सहाय्यक उपनिरिक्षक सुरेश वेळीप फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
