भुतानी प्रकल्पाचेर फुडली कारवाय करपाक सांकवाळ पंचायत अपेशी

भांगरभूंय | प्रतिनिधी

नोटिसेची मुजत सोंपूनय पंचायतीच्यो हालचाली नातः नारायण नायक

पणजीः सांकवाळ पंचायतीन भुतानी प्रकल्पाक काडिल्ली कारणां दाखय नोटिसेचेर कसलींच पावलां उबारूंक नात. नोटीस काडून बरोच तेंप जालो, पूण भुतानीन हे नोटिसेक जाप दिवंक ना आनी कायद्याचे उल्लंघन केलें म्हूण सांकवाळ पंचायतीन अजून फुडली कसलींच पावलां उबारूंक ना असो आरोप थळावे नारायण नायक हांणी केलाे.

सांकवाळ वाठारांत येवपी वादग्रस्त भुतानी प्रकल्पाचेर बोवाळ जातकच सरकाराक जाग आयली आनी मुरगांव नगर नियोजन प्राधिकरणान कारणां दाखय नोटीस काडिल्ली. तशेंच ह्या प्रकल्पाचे परवानगे भितर कसलीय भानगड आसल्यार परवाने रद्द करपाची शिटकावणी मुख्यमंत्र्यांनी दिल्ली. उपरांत सांकवाळ पंचायतीनय ह्या प्रकल्पाक नोटीस काडिल्ली. आतां बरोच तेंप जालो फुडले कारावायेचेर प्रस्न चिन्न उबें आसा.

भुतानी प्रकल्पाक सांकवाळ पंचायतीन काडिल्ले कारणां दाखय नोटिसेक 7 दिसां भितर जाप दिवपाक सांगिल्लें. पूण 15 दीस जावन गेले तरी अजून मेरेन हे नोटिसेक भुतानीन जाप दिवंक ना असो आरोप नायक हांणी केलाे.

ह्या प्रकल्पाक लिसेन्स दिवपा खातीर 11 मार्च 2024 दिसा पंचायतीची बसका जाल्ली. त्या वेळार ह्या प्रकल्पाक वीज आनी उदकाची जोडणी मेळूंक ना तशेंच रान खातें आनी नगर नियोजन खात्या कडल्यान तांकां हरकत ना दाखलो मेळूंक ना म्हूण विरोध केल्लो. पूण सत्ताधारी पंचाची संख्या चड आशिल्ल्या कारणान ह्या प्रकल्पाक मंजुरी दिली असो आरोप नायक हांणी केलो.

त्याच दिसा तांकां लिसेन्स मेळ्ळें आनी लोकांनी जेन्ना बोवाळ घालपाक सुरवात केली तेन्ना 25 सप्टेंबराक पंचायतीचे बसकेक लोकांच्या विरोधाक लागून पंचायतीन भुतानीक कारणां दाखय नोटीस काडपाक भाग पाडलें अशें नायक हांणी सांगलें.

सात दिसां भितर भुतानीन हे नोटिसेक जाप दिवपाक जाय आशिल्ली. पूण आतां 15 दीस जावन गेले तरी, अजून मेरेन कसल्योच हालचाली पंचायतीन घेवंक ना. पंचायतीन घेतिल्ल्या थारावा प्रमाण जर हे नोटिसेक वेळा भितर जाप दिली ना जाल्यार पंचायतीक दिल्लें लिसेन्स रद्द करपाचे हक्क आसात अशें सांगिल्लें. पूण हाचेर कसलीच फाटपुरवण जावंक ना असोय आरोप नायक हांणी केलो.

जी नोटीस मुरगांव निजोयन आनी उदरगत प्राधिकरणान भुतानीक काडिल्ली ते नोटिसेक भुतानीन जाप दिल्या. जी जाप नोटिसेंत भुतानीन दिल्या ती जाप प्राधिकरणान 10 ऑक्टोबराक जाल्ले नगर नियोजन खात्याच्या मंडळ बसकेंत मांडिल्ले. हे बसकेंत कसलो निर्णय जाता तें आमकां खबर ना अशें नायक हांणी सांगलें.