भांगरभूंय | प्रतिनिधी
न्युझिलॅण्ड पंगडान पाकिस्तानाक 54 धांवड्यांनी हारोवन बायलांचे संवसारीक टी-20 क्रिकेट सर्तीचे सेमी फायनलींत सुवात मेळयली. सर्तींतले अ गटांतले निमाणे लीग मॅचींत पाकिस्तान हारिल्ल्यान भारताचें लेगीत सर्तींतलें आव्हान सोंपलें.
हे मॅची पयलीं न्युझिलॅण्ड आनी भारत दोनूय पंगडांचे दरेकी चार गूण आशिल्ले. पाकिस्तानाचें आव्हान पयलींच सोंपिल्लें. ताका लागून हे मॅचीच्या निकालाचेर ताका कांयच फरक पडपाचो नाशिल्लो. पूण, तो जिखिल्लो जाल्यार भारत बरे नेटरन रेटीचेर सेमी फायनलींत पावतलो आशिल्लो.
मजगतीं, दुबय आंतरराष्ट्रीय स्टेडियमाचेर न्युझिलॅण्डान टॉस जिखून पयलीं बॅटींग करपाचो निर्णय घेतलो आनी निर्धारीत 20 ओव्हरींनी 6 विकेटी व्हगडावन 110 धांवड्यो केल्यो. पाकिस्तानाक जैता खातीर 111 धांवड्यांची मोख मेळ्ळी. पाकिस्तानाचो डाव 11.4 ओव्हरींनी फकत 56 धांवड्यांचेर सोंपलो. ईडन कार्सनाची प्लेयर ऑफ द मॅची खातीर निवड जाली. तिणें तीन ओव्हरींनी 7 धांवड्यो दिवन 2 विकेटी घेतल्यो.
ते पयलीं न्युझिलॅण्डा वतीन सुजी बेट्स हिणें सगल्यांत चड 28 धांवड्यो केल्यो. जाल्यार ब्रूक हॅलिडेन 22 धांवड्यांचें योगदान दिलें. पाकिस्ताना वतीन नसरा संधून 3 विकेटी घेतल्यो.
मोखीचो फाटलाव करपी पाकिस्तानाची सुरवात बरी जाली ना. पंगडान स ओव्हरींनी 28 धांवड्यांनी पांच विकेटी व्हगडायिल्ल्यो. ओपनर आलिया रियाज शुन्याचेर, इराम जावेद तीन धांवड्यांचेर, सदाफ शम्स दोन धांवड्यो करून बाद जाली. फ्रॅन जोनसान पयले ओव्हरींत दोन विकेटी घेतल्यो. मुनिबा अली (15) आनी मुखेली फातिमा सना (21) हांकांच दोट्टी आंकडो हुपपाक शक्य जालो. पांच बॅटर शुन्याचेर बाद जाले.
पाकिस्तानान बॉलींग विभाग सोडलो जाल्यार बॅटींग आनी फिल्डिंगेंत बाबत प्रदर्शन केलें. ताणें साबार कॅची सोडल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
