भांगरभूंय | प्रतिनिधी
फोंडें: फोंडें येरादारी पुलिसां वतीन राष्ट्रीय सुरक्षा सप्तका निमतान जागृताय कार्यावळ राबयतात. विवीध हायस्कुलाचे विद्यार्थी, टॅक्सी चालक, रिक्षा चालक, बस चालक आनी हेर सुवातांनी जागृताय करतात. लोकांनी येरादारी नेमांक पाळो दिवचो आनी अपघात आडावचें अशें आवाहन फोंडें येरादारी पुलीस निरिक्षक कृष्णा सिनारी हांणी केलां.
फोंडें येरादारी पुलिसांनी 1 जानेवारी ते 13 ऑक्टोबर मेरेन वट्ट 30,650 वाहन चालकां आड कारवाय करून 1,7967,00 रुपयांचो दंड वसूल केला. हातूंत सोऱ्याचे घुंवळेंत 294, गतीन वाहन चलोवप 2610, हॅल्मॅट घालिनासतना दुचाकी चलोवप 1580, वाहन चलयतना मोबायलाचेर उलोवप 72, फिल्मींग वाहनां 2901, घातक पार्कींग 2942, सीट बेल्ट घालूंक नाशिल्ले 298, नो एन्ट्री 4493 आनी हेर नेम भंग करपी वाहन चालकां आड कारवाय केल्या. 14 ऑक्टोबर सावन राष्ट्रीय सुरक्षा सप्ता मनयतात. ते निमतान विवीध कडेन येरादारी नेमा संबंदी जागृताय करतात.
फोंडें येरादारी पुलीस निरिक्षक कृष्णा सिनारी हांणी दुचाकी चालकांक हॅल्मॅट जाल्यार मोटार चालकांक सीट बेल्टाचो वापर करप गरजेचें जालां. रस्त्यार येवपी दरेक वाहन चालकान येरादारी नेमांक पाळो दिवपाची गरज आसा. तशेंच अपघात आडावपा खातीर यत्न करपाची गरज आसा. येरादारी पुलिसां वतीन हायस्कूल आनी हर सुवातांनी वाहन चालकांची जागृताय करतात आनी लोकांनी सहकार्य करपाची गरज आशिल्ल्याचें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
