भांगरभूंय | प्रतिनिधी
दर्यादेगेर कोयराच्यो सगळ्यांत चड कागाळी
पणजी, समीप नार्वेंकार : गोंयच्या दर्यादेगेर चलपी बेकायदेशीर गजालींचेर पाळत दवरून तांचेर कारवाय करपा खातीर लॉन्च केल्लें गोवा बीच व्हीजील ॲपा वरवीं आतां मेरेन १८५२ कागाळी नोंद जाल्यात. सगळ्यांत चड कागाळी दर्यादेगेर कोयराच्यो राशी पडिल्लीं ५९३ प्रकरणां आनी कोयर उडोवपी ४१० प्रकरणां नोंद जाल्यांत. सगळ्यात चड कागाळी मिरामार आनी करंजाळे दर्यादेगेर दरेकी २२२ प्रकरणां नोंद जाल्यांत. जाल्यार दर्यादेगेर टाऊट्स, मसाज, विक्रेकारांच्यो खूब उण्यो कागाळी आयल्यात, अशी म्हायती पर्यटन खात्यान दिल्या.
गोंयच्या दर्यादेगेर चलपी बेकायदेशीर गजालींचेर चाबूक बसपां खातीर पर्यटन खात्यान गोवा बीच व्हिजील ॲप २५ जानेराक लॉन्च केल्लो. गोंय इलेक्ट्रोनिक्स लिमिटेड हांणी तयार केल्ल्या ॲपाचेर सामान्य नागरीक दर्यादेगेर चलपी कसल्योय बेकायदो घडणुको वा गजालांची फोटो काडून तो ॲपाचेर अपलोड करपाक शकतांत आनी उपरांत पर्यटन खातें ताची दखल घेवन ताचेर कारवाय करतात.
हो ॲप लॉन्च जाल्लो तेन्ना ते आतां मेरेन १२१७ जाण ताचो वापर करतात. ह्या ॲपा वरवीं १८५२ कागाळी आतां मेरेन दाखल जाल्यात आनी १०३० प्रकरणांचेर कारवाय करून तीं निकालांत काडल्यांत. दक्षिण गोंयच्या २२ दर्यादेगेवेल्यो, जाल्यार उत्तर गोंयच्या १७ दर्यादेवेल्यो कागाळी ह्या ॲपा वरवी नोंद जाल्यात.
गोंयच्या ३७ दर्यादेगांचेर १९ प्रकारच्यो कागाळी नोंद जाल्यात. तातूंत सगळ्यांत चड कोयराच्यो राशी पडून आशिल्ल्याच्यो ५९३ कागाळी आयल्यात जाल्यार ४१० कोयर आनी घाण उडयतनाच्यो कागाळी आयल्यात. जाल्यार दर्याक तेंकून खाटी उबारपाच्यो २५२ कागाळी, दर्यादेगेर गाडयो चलोवपाच्यो २०५, घाण सोडप १५९, दर्यादेगेर खाणा वस्तु विकप १२५, बेकायदेशीर बांदकाम ३६, दर्यादेगेर टॅटू काडप १५, आवाज प्रदुशण १०, दर्याचेर मसाज करप ६, बुडपाच्यो ५, दर्याचेर सोरो पियेवप ५, दर्याचेर रांदप ४, दर्याचेर लग्न सुवाळे घडोवण हाडप ४, दर्यादेगेर टाऊटसांचो वावर ३, दर्यादेगेर इव्हेंट करप २ आनी अपघाताची एक कागाळ नोंद जाल्यात.
तशेंच ३७ दर्यादेगेवेल्यो वट्ट १८५२ कागाळीं मदल्यो २२२ कागाळी दरेकी मिरामार आनी करंजाळे दर्यादेगेर नोंद जाल्यात. झालोर आनी फातार्दे १९१, कळंगूटे १७६, उतोर्डा १२६, मोबोर ११२, केळशी १०९, वेळसाव १०३, बोगामाळो ६५, बागा ६०, माजोर्डा ५१, आरोशी ४२, पाळोळें ३४, सिकेरी ३२, वार्का २६, वागातोर आनी शापोरा २४, निल्ला २१, मोरजी २०, पाटणे १८, राजबाग आनी बायणा दरेकी १७, हणजुणा १६, मांन्द्रे, आश्वें आनी बाणावले दरेकी १५, गालजीबाग आनी कांदोळे गरेकी १५, केरी आनी होलांट दरेकी १३, आगोंद १२, शिरदोन १०, हरमल ९, तळपण आनी सेरनाभाटी दरेकी ८, कोलवा ६, ओझरान्त ५, बांबोळे ४ आनी बेताळभाटी २ कागाळी नोंद जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
