भांगरभूंय | प्रतिनिधी
मुंबय, खबरां संस्था: महाराष्ट्र विधानसभा वेंचणुकेचे फाटभुंयेर सगळ्या पक्ष फुडार्यांनी कामाक सुरवात केल्या. इत्सूक उमेदवार, सीट वाटपांतली फूट सोडोवपा खातीर बसका घेवप चालूच आसा. तातूंत सरकार एका फाटल्यान एक निर्णय घेत सुटला. आयतारा लेगीत मंत्रीमंडळाची बसका जाली. तातूंत तांणी जायते म्हत्वाचे निर्णय घेतले. आचारसंहिता खंयच्याय खिणाक चालीक लावपाची शक्यताय आसा अशी चर्चा सुरू आसा.
सोमारा मंत्रीमंडळाची बसका सकाळीं ९.३० वरांचेर जाली. फुडले दोन ते तीन दिसांत आचारसंहिता लागू येता. दिवाळे उपरांत विधानसभा वेंचणूक जातली असो संकेत उपमुख्यमंत्री अजीत पवार हांणी दिला. अशे परिस्थितींत जायत्या पक्षां मदीं ‘इनकमिंग’ आनी ‘आवटगोईंग’ सुरु आसा.
कितल्या टप्प्यांनी मतदान?
अजीत पवार गटाचे फुडारी बाबा सिद्दीकी हांचो खून जाले उपरांत राज्यांतलें राजकी वातावरण गरम जालां. मजगतीं, वेंचणूक आयोगाच्या सुत्रां प्रमाण महाराष्ट्रांत मतदान एक वा दोन टप्प्यांनी जावंक शकता. पूण एकाच टप्प्यांत वेंचणूक जावपाची शक्यताय चड आसा अशेंय सांगलां.
मंत्रीमंडळ बसकेंतले निर्णय
२३ सप्टेंबर : २४ निर्णय, ३० सप्टेंबर : ३८ निर्णय
४ ऑक्टोबर : ३२ निर्णय, १० ऑक्टोबर : ३८ निर्णय
निर्णयांचो स्फोट
विधानसभा वेंचणुके उपरांत सरकार लोकांक खोशी करपाचो यत्न करता. देखून तांणी सरकारी निर्णयांचे स्फोट केल्लें दिसता.
१० दिसांतले वट्ट सरकारी निर्णय : १२९१
१ ऑक्टोबर : १४८ निर्णय, ३ ऑक्टोबर: २०३ निर्णय
४ ऑक्टोबर: १८८ निर्णय, ५ ऑक्टोबर : २ निर्णय
७ ऑक्टोबर : २०९ निर्णय, ८ ऑक्टोबर : १५० निर्णय
९ ऑक्टोबर : १९७ निर्णय, १० ऑक्टोबर : १९४ निर्णय
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
