भांगरभूंय | प्रतिनिधी
मुबंय, खबरां संस्था: राष्ट्रवादी कॉंग्रेस (अजित पवार) पक्षाचे फुडारी आनी आदले मंत्री बाबा सिद्दीकी हांचो खून दसर्या दिसा रातच्या सुमार ९ वरांचेर जालो. ते वांद्रें हांगा आशिल्ल्या तांच्या पुताच्या कार्यालयांत वताले. तेन्ना तिगांनी तांचेर फारपेट केलो. ह्या प्रकरणांत गुरनैल सिंह आनी धर्मराज कश्यप ह्या दोगांक अटक केल्ली. हातुंतल्या धर्मराजान तो नेण्टो आशिल्ल्याचो दावो केल्लो. उपरांत ताची ऑसिफिकेशन तपासणी म्हळ्यार पिराय निश्चीत करपा खातीर हाडांची तपासणी केली. जातूंत तो नेण्टो नाशिल्ल्याचें मुखार आयलें.
दोग दुबावितांक केले न्यायालयांत हजर
बाबा सिद्दीकी हांचो खून करपी दोग दुबावितांक आयतारा न्यायालयांत हजर केले. तातुंतल्या गुरनैल सिंह हाका न्यायालयान २१ ऑक्टोबर मेरेन पुलीस बंदखण दिल्या. मात, दुसरो धर्मराज कश्यप नेण्टो आशिल्ल्याचो दावो वकिलांनी कोर्टांत केल्लो. धर्मराजाची पिराय १७ वर्सां आसा. ताका लागून ताचेर नेण्टो आरोपी म्हणून खटलो चलोवचो. पिरायेचे खात्री खातीर वैजकी चाचणे खातीर आमी तयार आसात, असो दावो दुबाविताच्या बापायन केल्लो. उपरांत खरी पिराय तपासपा खातीर न्यायालयान ऑसिफिकेशन तपासणी करपाचे निर्देश दिल्ले.
धर्मराज हो नेण्टो न्हय
धर्मराज कश्यप हाची ऑसिफिकेशन टेस्ट केली. हे तपासणेचो अहवाल मुखार आयले उपरांत धर्मराज हो नेण्टो न्हय हें सिद्ध जालें. तपासणेचो अहवाल आयले उपरांत आरोपी धर्मराज कश्यप हाका परत कोर्टांत हजर केलो. उपरांत न्यायालयान ताकाय २१ ऑक्टोबर मेरेन पुलीस बंदखण दिली.
आनीक एकल्याक अटक
मजगतीं ह्या प्रकरणांत फेसबुक पोस्ट करपी शुभम लोणकर नांवाच्या दुबावीताच्या भावाक पुण्यांतल्यान अटक केल्या. प्रवीण लोणकर (२८) अशें ताचें नांव. हे दोगूय भाव बाबा सिद्दीकी हांच्या खुनाच्या प्रकरणांत वांटेकार आशिल्ल्याचो आरोप तांचेर आसा.
शेनवारा रातीं जाल्ल्या फारपेटाचे घडणुके उपरांत ह्या खुनाची जापसालदारकी स्विकारपी एक फेसबुक पोस्ट ‘शुबू लोणकर महाराष्ट्र’ हे फेसबूक पेजी वेल्यान शेअर जाल्ली. उपरांत पुलिसांनी सोद घेतलो. शुबू हो अकोला जिल्ह्याच्या अकोटचो शुभम रामेश्वर लोणकर अशी म्हायती पुलिसांक मेळिल्ली. उपरांत ताका अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
