भांगरभूंय | प्रतिनिधी
चेन्नय, खबरां संस्था: चेन्नयचे एके कंपनीन दिवाळे पयलीं आपल्या कर्मचार्यांक गाडयो आनी मोटार सायकली भेटयल्यात. ह्या कंपनीचें नांव ‘टीम डिटेलिंग सोल्युशन्स’. ही कंपनी स्टील डिझायनाच्या मळार काम करता. म्हत्वाचें म्हणल्यार कंपनीन कर्मचार्यांक भेट दिल्ल्या गाडयां मदीं ह्युंडाय, टाटा, मारुती, सुझुकी आनी मर्सिडीज बँज ह्या गाडयांचो आसपाव आसा. कंपनीच्या ह्या निर्णया उपरांत आतां सोशल मिडियाचेर ताचेर खूब चर्चा सुरू आसा.
मनी कंट्रोलाच्या अहवाला प्रमाण हे कंपनीन २८ कर्मचार्यांक गाडी आनी २९ कर्मचार्यांक दोनचाकी भेट दिल्या. आमचे कर्मचारी आमकां म्हत्वाचे आसात. हे कर्मचारी आमची संपत्ती. कंपनीच्या येसस्वीपणांत ह्या कर्मचार्यांचो व्हड वांटो आसा. ह्या कर्मचार्यांक बरें काम करपाक उर्बा दिवपाच्या हेतान आमी भेट दिवपाचें थारायलें अशें कंपनीचे वेवस्थापकीय संचालक श्रीधरन कन्नन हांणी सांगलें.
२०२२ वर्सा लेगीत दोन कर्मचार्यांक भेट म्हणून गाडी दिली
आमचे कंपनींत सुमार १८० कर्मचारी आसात. दरेकलो आपल्या कामांत कुशळ आसा. हे सगळे कर्मचारी सादारण कुटुंबांतले. तातूंतले आमी कांय कर्मचारी वेंचून काडटात जे प्रामाणीकपणान आनी समर्पणान काम करतात. आमी पयलींय अशे तरेन कांय कर्मचार्यांक गाडयो आनी मोटार सायकल भेटयल्यात. २०२२ वर्सा आमी दोन
कर्मचार्यांक गाडयो भेटयल्यो. ते उपरांत आयज आमी २८ कर्मचार्यांक गाडयो भेटयल्यात. हातूंत मर्सिडीज बँज सारकिल्या म्हत्वाच्या गाडयांचो आस्पाव आसा अशें कन्नन हांणी सांगलें.
कर्मचार्यांक लग्ना खातीर एक लाख रुपया दितात
श्रीधरन कन्नन हांणी फुडें सांगलें, आमी गाडी वा मोटार सायकल भेट दितना दर थारायतात. कर्मचार्याक गाडी वा मोटार सायकल नाका जाल्यार ताचे खातीर पगार दितात. हाचे भायर ताका आनीक खंयचीय गाडी जाय जाल्यार थारावीक रकमेंत थोडे पयशे घालून ताका जाय ती गाडी घेवंक मेळटा. हाचे भायर आमी कर्मचाऱ्यांक तांच्या लग्नाकय पयशे दितात. आतां मेरेन आमी कर्मचार्यांक लग्नाक ५० हजार दिताले, ह्या वर्सा सावन आमी ती रक्कम १ लाख मेरेन वाडयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
