भांगरभूंय | प्रतिनिधी
पणजी, प्रतिनिधी : राज्यांत फाल्यां सावन सुरु जावपी रस्तो सुरक्षा सप्तकात जागृताय कार्यावळी आयोजीत करपा खातीर सरकारान पंचायत आनी नगरपालिकांक दरेकी 10 हजार रुपयांचो निधी मंजूर केला. रस्तो सुरक्षा सप्तकाचें उक्तावण फाल्यां सोमारा पणजें सकाळीं 10.30 वरांचेर मुख्यमंत्री डॉ. प्रमोद सावंत हांचे हस्तुकीं जातलें. 14 ते 20 ऑक्टोबर मेरेन तें चलतलें. उक्तावणाच्या कार्यावळीक येरादारी मंत्री माविन गुदिन्हो हांचे सयत हेर मानेस्त हाजीर आसतले.
राज्यांत अपघाताचे प्रमाण वाडत आसा. रस्तो सुरक्षा सप्तकांत अपघातांक आळाबंद घालपा खातीर सगळ्याक जागृतायेच्यो कार्यावळी जातात. विद्यालया, पंचायती तशेच हेर भौशीक वाठारांनी भाशणां, पथनाट्यां वा हेर कार्यावळी जातात. अपघात उणे करपा सयत रस्तो सुरक्षेचेर आधारीत ह्यो कार्यावळी आसता. पंचायती, पालिकांक तांणी केल्ल्या कार्यावळींची म्हायती दिवपा सयत बिलां येरादारी खात्याक सादर करचीं पडटलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
