भांगरभूंय | प्रतिनिधी
शिवपुरी, खबरां संस्था: मध्य प्रदेशांतल्या शिवपुरी जिल्ह्यांत एके नेण्टे चलयेचेर जाल्ल्या बलात्काराक लागून पुराय शार अजापीत जालां. एके १५ वर्सां पिरायेचे चलयेचेर तिच्याच बापायन आनी भावान बलात्कार केलो. इतलेंच न्हय पिडेस्त चलयेच्या भावान तिचो अश्लील व्हिडिओय काडला. तो व्हिडिओ दाखोवन तो ते चलयेक धमकायतालो. पिडेस्तान दाखल केल्ले कागाळी प्रमाण पुलिसांनी गुन्यांव दाखल करुन दोगांय आरोप्यांक अटक केली.
पुलिसांनी दिल्ले म्हायती प्रमाण,पिडेस्ताची आवय तांच्या कुटुंबा पसून वेगळी रावताली. ती ओडिशा रावताली. तीन वर्सां आदीं तिची आवय गेले उपरांत ते चलयेचो बापूय तिचेर बलात्कार करतालो. बापाय कडल्यान जावपी अत्त्याचाराक उबगून तिणें हे विशीं आपल्या भावाक कळयलें आनी ताचे कडेन मजत मागली. मात तिची मजत करपाचें सोडून भावानूय तिचेर बलात्कार केलो आनी तिचो व्हिडिओय काडलो.
पिडेस्ताचो व्हडलो भावूय तिचेर सेगीत बलात्कार करीत आशिल्लो आनी हे विशीं कोणायकूय सांगल्यार मारून उडोवपाची धमकीय तो तिका दितालो. उपरांत पिडेस्तान हे विशीं आपल्या दुसर्या भावाक सांगलें. उपरांत त्या दोगांयनी पुलिशेंत वचून कागाळ दाखल केली. पिडेस्ताचे कागाळी उपरांत पुलिसांनी दोगांय आरोपींक अटक केल्या. तांचेर गुन्यांवूय दाखल केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
