भांगरभूंय | प्रतिनिधी
इटा, खबरां संस्था: उत्तर प्रदेशांत एक गुन्यांव जाला. अश्या गुन्यांवाची आमी फकत सिनेमांनी वा सिरियलांनी कल्पना करपाक शकतात. अलका नांवाचे ४२ वर्सां पिरायेचे बायलेन आपल्याच १७ वर्सां पिरायेच्या चलयेक जिवेशीं मारपा खातीर एकल्याक सुपारी दिली. पूण अलकान घाल्ल्या सांपळ्यांत ती स्वताच आडकली. जाका अलकान खून करपाक पयशे दिल्ले ताणें तिकाच मारली. ही घडणूक उत्तर प्रदेशांतल्या इटा जिल्ह्यांत घडली. अलका घरा येवंक नाशिल्ल्यान तिचो घोव रमाकांत हांणी पुलिशेंत कागाळ केली. उपरांत ६ ऑक्टोबराक आलकाची कूड पुलिसांक शेतांत मेळ्ळी.
सुपारी कित्याक दिली?
पुलिसांच्या म्हणण्या प्रमाण, १७ वर्सां पिरायेचे चलयेचे प्रेमसंबंद आशिल्ल्यान ती सामकी बेजार आशिल्ली. तिका समजावन लेगीत ती सुदरनाशिल्ल्यान आवयन तिचो खून करपाचें थारायलें. हे खातीर तिणें सुभाष नांवाच्या मनशा कडेन संपर्क सादलो, जो हालींच बलात्कार प्रकरणांत ख्यास्त भोगले उपरांत बंदखणींतल्यान सुटिल्लो. अलकान सुभाषाक ५० हजार रुपयांची सुपारी दिवन चलयेचो खून करपाक सांगलें.
हे घडणुकेक मेळ्ळो ट्वीस्ट
अलकान जेन्ना सुभाषाक सुपारी दिली तेन्ना तिका खबर नाशिल्ली की तिचे चलयेचो मोगी ३५ वर्सांचो सुभाषूच आसा. सुभाषान तिचे चलयेक एक मोबायल दिल्लो. जाचे वेल्यान तीं दोगांय संपर्कांत आशिल्लीं. सुभाषाक सुपारी मेळ्ळे उपरांत ताणें हो प्लॅन चलयेक सांगलो. उपरांत चलयेन सुभाषाक लग्नाची मागणी घालून आपलेच आवयचो कांटो काडपाक सांगलें. त्या दोगांयनी अलकाक सोंपोवपाचो प्लॅन केलो.
उपरांत सुभाषान चलयेक मारून उडयिल्ल्याचें नाटक करून अलकाक ताचे फोटो धाडले आनी तिचे कडल्यान आनीक पयशांची मागणी केली. उपरांत अलका सुभाषाक मेळपा खातीर आग्रा गेली तेन्ना सुभाषान तिका खरें सांगून उडयलें. मागीर सुभाष, अलका आनी तिची चली आग्राच्यान भायर सरलीं. इटा शारांत येतना त्या दोगांयनी गळो दामून अलकाचो खून केलो आनी एका बाजरीच्या शेतांत तिची कूड उडयली.
अलकाची कूड मेळ्ळ्या उपरांत पुलिसांनी गुन्यांवाच्या दुबावान तिचे धुवेक आनी सुभाषाक अटक केली आनी सगलें प्रकरण उजवाडांत आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
