भांगरभूंय | प्रतिनिधी
भारतान तिसरे टी-20 मॅचींत बांगलादेशाक 133 धांवड्यांनी हारोवन तीन मॅचींची माळ 3-0 फरकान जिखून तांचो व्हायट वॉश केलो. ते पयलीं जाल्ली टॅस्ट माळ 2-0 फरकान जिखिल्ली.
हांगाच्या राजीव गांधी आंतरराष्ट्रीय स्टेडीयमाचेर जाल्ले मॅचींत भारतान बांगलादेशा मुखार 298 धांवड्यांचें कठीण आव्हान दवरिल्लें. ह्या आव्हानाचो फाटलाव करतना बांगलादेशाक निर्धारीत 20 ओव्हरींनी 7 विकेटी व्हगडावन 167 धांवड्यो करप शक्य जाल्यो. हे मॅची उपरांत बांगलादेशाचो अश्टतासांचो खेळगडो महमुद्दुलाहान निवृत्ती घेतली.
बांगलादेशा वतीन परवेझ हुसैन इमॉन आनी तान्झिद हसन हाणें डावाची सुरवात केली. पूण, पयल्याच बॉलाचेर परवेझाक मयंक यादवान बाद केलो. रियान परागान ताची कॅच धरली. ते उपरांत तान्झिदान मुखेली नजमूल हुसैन शान्तो वांगडा मेळून डाव सांबाळपाचो यत्न केलो. पूण, तान्झिद हसन 15 धांवड्यांचेर जाल्यार शान्तो 14 धांवड्यांचेर बाद जालो.
ते उपरांत लिटन दास आनी तौहिद हृदोय हांणी अर्द शेंकड्याची भागिदारी करून डाव सांबाळ्ळो. तांणी पंगडाचो 100चो टप्पो 10 ओव्हरींनी हुपून दिलो. पूण, लिटन दास 12वे ओव्हरींत रवी बिश्नोईचे बॉलिंगेचेर 42 धांवड्यांचेर बाद जालो. ते उपरांत अर्द शेंकड्याची खेळी करीत तौहिदान एक बाजू सांबाळून धरली. पूण, दुसरे वटेच्यान ताका म्हणपा सारकी साथ मेळूंक ना. महमुद्दुलाह (8), मेहदी हसन (3) आनी रिशाद हुसैन (0) सवाय भितर बाद जाले. अखेरेक तौहिद 42 बॉलांनी 63 धांवड्यांची खेळी करून नाबाद उरलो. तान्झिम हसन साकिब 8 धांवड्यांचेर नाबाद उरलो.
रवी बिश्नोईन सगल्यांत चड तीन विकेटी घेतल्यो. मयंक यादवान 2 जाल्यार वॉशिंग्टन सुंदर आनी नितीश कुमार रेड्डीन एकेक विकेट घेतली.
ते पयलीं संजू सॅमसनाचो वादळी शेंकडो (111), ताणें सूर्यकुमार यादव (75) हाच्या वांगडा केल्ली 173 धांवड्यांची भागिदारी आनी हार्दिक पांड्या (47) दिल्ल्या योगदानाक लागून भारताक 297 धांवड्यांचो पावस घालप शक्य जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
